Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 93 Hüküm no: 56 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Kaliyo’nun alacak davasının reddi Arnavud tâifesinden [Ko]sta v. Kaliyo nâm zimmî mahfil-i kazâda kiremitçi tâifesinden Avanos v. Can ve Asvazador v. İskender nâm Ermeniler muvâcehelerinde üzerlerine da‘vâ [ve] takrîr-i kelâm edip târih-i kitâbdan bir sene mukaddem mezbûrân Avanos ve Asvazador’un Ha[s]köy’de vâki‘ kârhânelerine mezbûrânın emirleri ile her bir peremesi dokuzar akçeye olmak üzre yedi sekiz yüz pereme balçık getirip meblağ-ı mezbûr yedi bin iki yüz akçeden altı bin dört yüz akçesini yedlerinden ahz ve kabz edip bâkī zimmetlerinde sekiz yüz akçe hakkım vardır, meblağ-ı mezbûru da‘vâ ve taleb ederiz dedikde gıbbe’s-suâl ve’l-ikrâr, meblağ-ı mezbûr yedi bin iki yüz akçeyi müdde‘î-i mezbûr Kosta’ya bi’t-tamâm edâ ve îfâ eyledik meblağ-ı mezbûrdan yedimizde bir akçe ve bir habbe hakkı bâkī kalmadı dediklerinde gıbbe’l-istintâk ve akībe’l-inkâr mezbûrân Avanos ve Asvazador’dan meblağ-ı mezbûru müdde‘î-i merkūma bi’t-tamâm ve’l-kemâl edâ ve îfâ eylediklerine beyyine taleb olundukda Ermeni tâifesinden Arican v. Velas ve Mıgırdiç v. Avanos nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mezbûrân Avanos ve Asvazador meblağ-ı mezbûr yedi bin iki yüz akçeyi müdde‘î-i mezbûr Kosta’ya bizim huzûrumuzda bi’t-tamâm ve’l-kemâl def‘ ve teslîm edip ol dahi ahz ve kabz etmişidi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl şehâdetleri makbûle olup bî-vech mu‘ârazadan mezbûr Kosta men‘ birle mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Ali Beşe b. Mustafa, Mustafa b. Veli, Cafer b. Abdullah, Mustafa b. Ahmed.