Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 95 Hüküm no: 59 Orijinal metin no: [8b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimo’nun evini Cafer Paşa Vakfı’na sattığı Havâss-ı Refî‘a kazâsı müzâfâtından Kurfa nâm karye zimmîlerinden Yorgi v. Dimo nâm zimmî mahfil-i kazâda Hazret-i Ebî Eyyûb el-Ensârî’de vâki‘ merhûm Cafer Paşa vakfı’na bi’l-fi‘l mütevellî olan bâ‘isü hâze’l-kitâb Mehmed Bey b. Hamza mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafı Angeli nâm zimmî mülkü ve bir tarafı Andon ve bir tarafı Angeli v. İstemad ve bir tarafından Dimo v. İstemad mülkü ile mahdûd olan mülk menzilimi, bundan akdem vakf-ı mezbûr mütevellîsi olan Mehmed Çelebi b. Mahmud’a mâl-ı vakf-ı mezbûr ile yedi bin dört yüz nakd-i râyic fi’l-vakt fıddî akçeye bi tarîki’l-istiğlâl bey‘ ve teslîm edip ol dahi vech-i muharrer üzre iştirâ ve tesellüm eyledikden sonra menzil-i mezbûru târih-i kitâb senesi Muharremü’l-harâmı gurresinden üç sene tamâmına değin mezbûrü’n-na‘t üç bin üç yüz otuz akçeye mütevellî-i sâbık mezbûr Mehmed Çelebi b. Mahmud’dan istîcâr eyleyip merkūm Mehmed Çelebi dahi vech-i meşrûh üzre bana îcâr ve teslîm eylemişidi vakf-ı mezbûra menzil-i merkūmun müddet-i merkūme hulûlünden vâcib olacak icâresinden üç bin üç yüz otuz akçe deynim vardır dedikde mukırr-ı mezbûr Yorgi’nin ber vech-i meşrûh cârî olan ikrâr ve i‘tirâfını mütevellî-i mezbûr Mehmed Bey b. Hamza vicâhen tasdîk ve şifâhen tahkīk eyledikde karye-i mezbûre sâkinelerinden Aleksandra bt. Todori nâm Nasrâniye meclis-i şer‘de menzil-i merkūmun derkine ve ücret-i merkūmeye emr ve kabûlü hâviye kefâlet ile kefîl olmağın mâ hüve’l-vâki‘ gıbbe’t-taleb ketb olundu. Tahrîren fî evâhiri Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Efendi b. Ali el-İmâm, Yakub Çelebi b. Kurd Ser-bölük, Mustafa Çelebi b. Veli el-Muhzır, Cafer b. Abdullah, Ali b. Mustafa ve gayruhüm.