Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 95 Hüküm no: 60 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın evini Didi v. Kiti’ye sattığı Rumeli’nde Delvine sancağında Mazaraki kazâsına tâbi‘ Lospi nâm karyeden Ali b. Abdullah nâm kimesne mahfil-i kazâda râfi‘ü hâze’l-kitâb Didi v. Kiti nâm zimmî muvâcehesinde bi tav‘ihî ikrâr ve i‘tirâf edip işbu akdin sudûruna değin silk-i mülk-i sahîhimde münselik olup karye-i merkūmede vâki‘ bir tarafdan Ahmed Çelebi mülkü ve bir tarafdan Dido v. Kiti mülkü ve bir tarafdan Koço Yani mülkü ve bir tarafdan orman ile mahdûd bir bâb tahtânî beyti ve zât-ı eşcâr-ı müsmire ve gayr-ı müsmire eşcârı müştemil mülk menzilimi, cümle tevâbi‘ ve levâhıkı ile mezbûr Didi’ye fıddî nakd-i râyic fi’l-vakt sekiz yüz akçeye bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra kabz-ı semen-i ma‘dûd edip mebî‘-i mahdûd-ı merkūmu mahallinde ahz ve kabza mezbûr Didi’yi taslît eyledim ba‘de’l-yevm menzil-i merkūm mezbûr Didi’nin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı merkūm Ali’nin minvâl-i meşrûh üzre cârî olan ikrârını el-mukarru lehü’l-merkūm Didi vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ aşer min Cumâdelâhire li sene seb‘a ve erba‘în ve elf. Şuhûdü’l-hâl: Mehmed b. Hasan, Hasan Hoca b. ( ), Mehmed b. Süleyman, Ahmed b. Hasan, Cafer b. Abdullah, Kiti v. Mihal, Dimo [v.] Pirimi, Kesari v. Liyar, Kebki v. Kesari, Dimo v. Nika ve gayruhüm.