Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 96 Hüküm no: 61 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Yağmur’un evini Kulu b. Mehmed’e sattığı Medîne-i Hazret-i Ebî Eyyûb el-Ensârî mahallâtından Evlice Baba mahallesinde sâkin Hasan b. Yağmur nâm kimesne mahfil-i kazâda işbu bâ‘isü’l-kitâb Kulu b. Mehmed nâm kimesne mahzarında ikrâr ve i‘tirâf edip mahalle-i mezbûrede vâki‘ bir tarafı Nakīb Yusuf mülkü ve bir tarafı bî-zebân Cündî mülkü ve bir tarafı Hayâti Hâtun mülkü ve bir tarafı tarîk-i âm ile mahdûd iki bâb tahtânî odaları ve müşterek bi’r-i mâyı ve kenîfi müştemil olan mülk menzilimi, cümle tevâbi‘ ve levâhıkı ile mezbûr Kulu’ya tarafeynden îcâb ve kabûlü hâvî bey‘-i bâtt-ı sahîh-i şer‘i ile altı bin nakd-i râyic fi’l-vakt fıddî akçeye bey‘ ve teslîm edip ol dahi vech-i muharrer üzre iştirâ ve kabûl ve tesellüm eyledikden sonra semeni olan meblağ-ı merkūm altı bin akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i merkūm mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırr-ı merkūmun ber vech-i meşrûh cârî olan ikrâr ve i‘tirâfını el-mukarru lehü’l-merkūm Kulu vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire li sene seb‘a ve erba‘în ve elf. Şuhûdü’l-hâl: Mahmud Çelebi b. el-İmâm, Ömer Halîfe b. ( ) el-Müezzin, Ali Beşe b. Mahmud, Mahmud b. Veli, Hasan Beşe b. Yusuf, Abdünnebi b. Veli, Mehmed b. Budak, Yakub b. Kurd ve gayruhüm.