Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 97 Hüküm no: 62 Orijinal metin no: [9a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş’a borcu olan Âişe bt. Mustafa’dan paranın tahsili Medîne-i Hazret-i Ebî Eyyûb el-Ensârî’de vâki‘ merhûm Zal Mahmud Paşa hucurâtında sâkin iken lâ-an vâris vefât eden merhûm Mustafa Çavuş b. Uğurlu’nun muhallefâtı cânib-i beytülmâle âid olmağın medîne-i merkūmede bi’l-fi‘l beytülmâl emîni olan Mustafa Çelebi b. Veli mahfil-i kazâda işbu bâ‘isetü’l-kitâb Âişe bt. Mustafa nâm hâtun mahzarında ikrâr ve takrîr-i kelâm edip müteveffâ-yı merkūm Mustafa Ça[vu]ş’un merkūme Âişe Hâtun zimmetinde beş bin yedi yüz akçe hakkı olmağın mezbûre Âişe Hâtun medîne-i mezbûre mahallâtından Baba Haydar mahallesinde vâki‘ bir tarafı Süleyman mülkü ve bir tarafı diğer Süleyman vakfı ve bir tarafı Kamer Hâtun vakfı ve bir tarafı tarîk-i hâs ile mahdûd olan mülk menzilini bi tarîki’l-istiğlâl rehin vaz‘ eylemiş idi hâlâ emânetim hasebiyle meblağ-ı merkūm beş bin yedi yüz akçeyi mezbûre Âişe Hâtun yedinden bi’t-tamâm ve’l-kemâl ahz ve kabz edip fekk-i rehn eyledim min ba‘d müteveffâ-yı mezbûr Mustafa Çavuş malından merkūm Âişe Hâtun zimmetinde bir akçe ve bir habbe bâkī kalmadı dedikde mukırr-ı merkūmun ber vech-i meşrûh cârî ve sâdır olan ikrâr ve takrîrini mezbûre Âişe Hâtun vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-âşir min Cumâdelâhire li sene seb‘a ve erba‘în ve elf. Şuhûdü’l-hâl: Eş-Şeyh Nasrullah b. el-merhûm Ömer Efendi, Avnullah Efendi b. Ömer Efendi, Alemüddin Halîfe b. Hüsameddin, Hasan Halîfe b. Mehmed, Şaban Halîfe, İlyas Çelebi b. Yakub, Abdurrahman Çelebi ve gayruhüm.