Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 98 Hüküm no: 64 Orijinal metin no: [9b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdi’nin evini istiğlâl yoluyla Hamza Çavuş Vakfı’na sattığı Hazret-i Ebî Eyyûb el-Ensârî mahallâtından Fethi Çelebi mahallesinde sâkin olan Mehmed Çelebi b. Abdi nâm kimesne meclis-i şer‘-i şerîfde hâzır olup âtiyyü’z-zikr menzilini merhûm Hamza Çavuş vakfı’na mütevellî olan hâmil-i hâze’l-kitâb Mehmed Çelebi’ye bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûr Mehmed Çelebi’nin işbu akdin sudûruna kadar sâhibi ve mâliki olduğu, elinde ve taht-ı tasarrufunda bulunduğu medîne-i mezbûre mahallâtından Şeyh Ahmed mahallesinde kâin bulunan bir tarafdan Seydi mülkü diğer tarafdan Belkıs Hâtun mülkü öteki tarafdan Hasan mülkü ve diğer tarafdan da tarîk-i âm ile mahdûd olan mülk menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt altı bin akçe semen-i mu‘ayyen-i makbûzla ondan iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına iki bin iki yüz akçe ücret ile menzil-i mezbûru kirâya verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra Şaban Çelebi b. Abdullah nâm kimesne menzil-i mezbûrun derkine ve ücret-i mezbûreye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâni ve’l-ışrîn min Cumâdelâhire sene seb‘a ve erba‘în ve elf. Şuhûdü’l-hâl: İmâm İbrahim Halîfe b. Mustafa, Mehmed b. Hasan, Ali b. Nesimi, Şeyh Mehmed Efendi b. Pîrî, Oruc b. (…), müezzin Murtaza Halîfe b. Mehmed, Habib b. Kemal, Bayram b. Ebûbekir, Sinan Halîfe b. Mustafa, Hüseyin Çelebi b. Abdi, Şeyhî Çelebi b. Hüseyin ve gayruhüm