Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 98 Hüküm no: 65 Orijinal metin no: [9b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçiler Kethüdası el-Hâc İsmail b. Hasan’ın Rus asıllı câriyesini mükâtebe yoluyla azat ettiği Medîne-i Hazret-i Ebî Eyyûb el-Ensârî mahallâtından Ahmed Dede mahallesi sükkânından olan udûlden Ramazan Halîfe b. Yunus ve el-Hâc Mehmed b. (…) nâm kimesneler meclis-i şer‘-i şerîfde hâzırân olup bundan yedi sene mukaddem Hac yolunda vefât eden ekmekçiler kethüdâsı el-Hâc İsmail b. Hasan’ın vasiyy-i muhtârı olan Pîrî b. İbrahim mahzarında orta boylu, şehlâ, açık kaşlı, buğday tenli, sol gözü üzerinde eser-i cerh bulunan Rûsiyyetü’l-asl müslimetü’l-mille hâmile-i hâze’l-kitâb Şirin bt. Abdullah nâm hâtundan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki müteveffâ-yı mezbûr el-Hâc İsmail, hacc-ı şerîfe müteveccih iken târih-i mezbûrda bizim yanımızda ve katımızda câriye-i memlûkesini beş sene müddetle zevcesine hizmet etmesi üzerine kitâbete kesmişidi câriye-i mezkûre yedi sene hizmet-i merkūmeyi edâ etti ve bu sûretle diğer harâir-i asliyyât-ı mükellefât gibi hürre bir kimesne oldu. Efendilerin âzâdlı köleler üzerinde şer‘an sâbit olan velâ hakkından gayrı üzerinde kimesnenin bir hakkı kalmadı şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’s-sâlis ve’l-ışrîn min Cemâziyelâhir sene seb‘a ve erba‘în ve elf. Şuhûdü’l-hâl: Çukadâr Mustafa Beşe b. Mahmud, Ali Çelebi b. Abdullah, Mustafa Çelebi b. İsa, Mahmud b. Ahmed, Baba Cafer (…)