Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 99 Hüküm no: 66 Orijinal metin no: [9b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Halîfe b. Mustafa’nın evini Âişe bt. Bayram’a sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Câmi‘-i Kebîr mahallesinde sâkin Osman Halîfe b. Mustafa el-Kayyım meclis-i şer‘-i hatîr-i lâzımü’t-tevkīrde işbu hâmilet-i hâze’l-kitâb Âişe bt. Bayram tarafından ikrâr-ı âti’z-zikri tasdîka vekîl olup bimâ hüve nehcü’s-sübût vekâleti sâbite olan zevci Kasım Çelebi b. Sinan mahzarında bi’t-tav‘i’s-sâf ikrâr [10a] ve i‘tirâf edip medîne-i mezbûre mahallâtından Evlice Baba mahallesinde vâki‘ bir tarafdan Ali Beşe mülkü ve bir tarafdan Mehmed ve Mustafa b. Şaban nâm karındaşlar mülkleri ve bir tarafdan Hasan Beşe mülkü ve bir tarafdan tarîk-i âm ile mahdûd ve mümtâz iki bâb tahtânî beyti ve bi’r-i mâyı ve muhavvata-i zât-ı eşcâr-ı müsmire ve gayr-ı müsmireyi müştemil mülk menzilimi, cümle tevâbi‘ ve levâhıkı ile târih-i kitâbdan on beş sene mukaddem müvekkile-i mezbûre Âişe’ye fıddî nakd-i râyic fi’l-vakt yedi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr yedi bin akçeyi mukaddemâ mezbûre Âişe yedinden tamâmen alıp kabz edip teslîm-i mebî‘ etmişidim zikr olunan menzil ile’l-ân mezbûre Âişe’nin mülk-i müşterâsıdır, keyfe mâ teşâ’ ve tahtâr mutasarrıfa olsun dedikde mukırr-ı mezbûr Osman Halîfe’nin minvâl-i muharrer üzre cârî olan ikrârını vekîl-i merkūm Kasım Çelebi vicâhen tasdîk ve şifâhen tahkīk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sâdis ve’l-ışrîn min Cumâdelâhire li sene seb‘a ve erba‘în ve elf. Şuhûdü’l-hâl: Mahmud Efendi b. Mehmed el-İmâm, Ömer Halîfe b. Halil el-Müezzin, Süleyman [b.] Hasan, Mustafa [b.] Rıdvan, Mustafa b. Veli, Yusuf b. ( ), Mehmed b. Şaban, Mustafa b. Şaban, es-Seyyid Pîrî Efendi b. ( ), İlyas Çelebi b. Yakub.