Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 100 Hüküm no: 67 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Abdullah’ın bazı eşyaları Hüseyin b. Osman’a hibe etmesi Medîne-i Hazret-i Ebî Eyyûb el-Ensârî mahallâtından Nişancı Paşa mahallesinde sâkine Râziye bt. Abdullah nâm hâtun meclis-i şer‘-i hatîr-i lâzımü’t-tevkīrde mu‘takası Yasemin bt. Abdullah nâm hâtunun sadrî oğlu işbu hâmilü’l-kitâb Hüseyin b. Osman nâm şâbb-ı bâliğ mahzarında bi tav‘ihâ ikrâr ve i‘tirâf edip silk-i mülkümde olan emlâkimden iki beledî döşek ve iki beledî yorgan ve iki beledî yasdık ve bir alaca kilim ve bir kaliçe ve iki tencere ve beş sahan ve bir tava ve bir tepsi ve bir sini ve iki sepet sandığımı mezbûr Hüseyin’e hibe-i sahîha-i şer‘iyye ile hibe ve teslîm edip ol dahi vech-i meşrûh üzre meclis-i hibede ittihâb ve kabûl ve kabz eyledi ba‘de’l-yevm zikr olunan eşyâ-i mezbûr Hüseyin’in mülk-i mevhûbu olmuşdur dedikde mukırra-i mezbûre Râziye’nin minvâl-i meşrûhu üzre cârî olan ikrârı mezbûr Hüseyin bi’l-muvâcehe tasdîk ve eşyâ-i merkūmeyi ittihâb ve kabz eylediğini bi’l-müşâfehe tahkīk eyledikden sonra mukābelesinde dahi mezbûre Râziye’yi hayâtda oldukça infâk eylemeğe ta‘ahhüd eylemeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-hâmis ve’l-ışrîn min Cumâdelâhire li sene seb‘a ve erba‘în ve elf. Şuhûdü’l-hâl: Abdurrahman Halîfe b. Şeyh Musa el-İmâm, Ramazan b. Hüseyin el-Müezzin, Receb b. Hızır, Ahmed b. Ali, Yusuf b. Abdullah, Mustafa b. Muharrem, Ahmed b. Cafer, Hüseyin b. Hızır, Hüseyin Ağa [b.] taşçı Ali.