Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 100 Hüküm no: 68 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hatun’un vakfettiği evin Hasan Efendi b. Hacı Ahmed’e verilmesi Zahrü’l-kuzât Hüsameddin Efendi b. Ahmed mahfil-i kazâda râfi‘ü hâze’l-kitâb Hasan Efendi b. el-Hâc Ahmed mahzarında bi tav‘ihî ikrâr ve i‘tirâf edip medîne-i hazret-i Ebî Eyyûb el-Ensârî mahallâtından Câmi‘-i Kebîr mahallesinde vâki‘ bir tarafı vakıf odalar ve bir tarafı tavukçu Mehmed Çelebi mülkü ve bir tarafı Yoğurtçuzâde Mustafa Çelebi mülkü ve taraf-ı râbi‘i Babazâde vakfı ile mahdûd bir bâb beyt-i süflî ve bir beyt-i ulvî ve bi’r-i mâ ve cüneyne ve muhavvatayı müştemil olup merhûm Kamer Hâtun nâm sâhibetü’l-hayr vakf ve süknâsını beher yevm üç İhlâs-ı şerîf tilâvet edip meremmât-ı lâzımesin sâkin olan kimesne kendi malından etmek üzre sulehâya şart eylediği ve menzil ile’l-ân taht-ı tasarrufumda olup hâlâ hüsn-i ihtiyârımla hakk-ı süknâsın mezbûr Hasan Efendi’ye fâriğ oldum, ber mûceb-i şart-ı vâkıfa mutasarrıf olsun dedikde gıbbe’t-tasdîki’ş-şer‘î ketb ve terkīm ve yed-i tâlibe vaz‘ ve def‘ ve teslîm olundu. Hurrire fî evâhiri Cumâdelâhire li sene seb‘a ve erba‘în ve elf. Şuhûdü’l-hâl: Fahrü’l-kuzât Ahmed Efendi b. Hasan, Ahmed Çelebi b. Cafer, İbrahim Efendi b. ( ) el-Müderris, Hüseyin Efendi b. ( ), el-Müderris, Yakub b. Kurd.