Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 107 Hüküm no: 80 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Angeli’nin evini Rali v. Dimitri’ye sattığı Havâss-ı Aliyye kazâsı müzâfâtından Küçükçekmece nâhiyesine tâbi‘ Makrahorya nâm karye sâkinlerinden Yani v. Angeli nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Rali v. Dimitri nâm zimmî muvâcehesinde ikrâr ve i‘tirâf edip karye-i mezbûrede vâki‘ bir tarafdan Niko v. Eyvan mülkü ve bir tarafdan Yando v. Bor mülkü ve iki tarafdan tarîk-i âm ile mahdûd bir bâb fevkānî beyti ve bi’r-i mâ ve kenîfi ve eşcâr-ı müsmire ve gayr-ı müsmireyi hâviye cüneyneyi müştemil olan mülk menzilimi, cümle tevâbi‘ ve levâhıkı ile mezbûr Rali’ye fıddî nakd-i râyic fi’l-vakt iki yüz elli riyâlî guruşa bey‘ bi’l-vefâ ile bey‘ edip ol dahi vech-i meşrûh üzre iştirâ ve kabûl eyledikden sonra semeni mezbûr iki yüz elli riyâlî guruşu mezbûr Rali yedinden bi’t-tamâm ve’l-kemâl ahz ve kabz edip teslîm-i mebî‘ eyledim eğer meblağ-ı mezbûr iki yüz elli riyâlî guruşu târih-i kitâbdan üç yüz gün tamâmına değin edâ etmez isem bey‘-i mezbûr bâtta münkalib olup zikr olunan menzil mezbûr Rali’nin mülk-i mahzı olup keyfe mâ yeşâ’ ve yahtâr mutasarrıf olsun [dedikde] gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fî gurreti Cumâdelâhire li sene seb‘a ve erba‘în ve elf. Şuhûdü’l-hâl: Ali Bey b. Abdullah el-Cündî, Ali b. Abdullah, Şaban b. Abdullah Ali b. Mustafa, Manol [v.] Nikola, Manol v. Nikola, Kosta v. Horhor, Pilaş v. Yani ve gayruhüm.