Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 108 Hüküm no: 82 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynîşah Sultan Vakfı’na ait çiftliğin Mehmed Beşe b. Ahmed ve Emine Hatun bt. Mehmed’e bey‘ bi’l-istiğlâl yoluyla satması Medîne-i İstanbul’da vâki‘ merhûme Aynîşah Sultan evkāfı’na bi’l-fi‘l mütevellî olan fahrü’l-akrân Mahmud Çelebi b. Mustafa mahfil-i kazâda işbu râfi‘ü’l-kitâb Mehmed Beşe b. Ahmed ve Emine Hâtun bt. Mehmed mahzarlarında ikrâr ve takrîr-i kelâm edip evkāf-ı mezbûreden olup Havâss-ı Aliyye kazâsı müzâfâtından Terkos nâhiyesine tâbi‘ Tilkiköyü demekle ma‘rûf karyede vâki‘ bir tarafdan Karatepe ve bir tarafdan Tuna kemeri ve bir tarafdan taşegî köprü ve bir tarafdan sâhil-i bahr ile mahdûd bir beyt-i süflîyi ve bir ahırı ve kışlağı ve yaylağı ve mandırayı ve koruyu ve merhûm ve mağfûrun-leh Fâtih Sultan Mehmed Hân evkāfı’ndan olup senede bin iki yüz akçe mukāta‘ası olan üç kıt‘a çayırı ve çiftlik ta‘bîr olunur vakıf menzili, cemî‘ tevâbi‘ ve levâhıkı ve kâffe-i menâfi‘ ve merâfıkı ile ve hâlâ içinde mevcûd olan beş re’s camus ineği ve üç re’s camus danası ve iki re’s camus buzağısı ile tevliyyet-i mahkiyem hasebiyle vakf-ı mezbûr nâzırı ma‘rifetiyle bin kırk altı senesi Cemâziyelevveli’nin on beşinci gününden üç sene tamâmına değin beher sene sekiz bin iki yüz akçeye mezbûrân Mehmed Beşe ve Emine Hâtun’a îcâr ve teslîm eyledim senede bin iki yüz akçesi Sultan Mehmed Hân vakfı’na olan çayırlar mukāta‘asına verip yedi bin akçesin cânib-i vakf-ı mezbûra edâ edip menzil-i mezbûrun ba‘zı meremmât-ı zarûriyyesin kendi mâllarından etmek üzre dedikde mütevellî-i mezbûru cemî‘ ikrâr-ı meşrûhunda mezbûrân Mehmed Beşe ve Emine dahi bi’l-muvâcehe tasdîk ve zikr olunan çiftliği minvâl-i meşrûh üzre mütevellî-i merkūmdan istîcâr ve kabûl ve kabz ve tesellüm eylediklerini bi’l-müşâfehe tahkīk etmeğin mâ hüve’l-vâki‘ gıbbe’t-taleb ketb olundu. Tahrîren fî evâhiri Cemâziyelevvel li sene seb‘a ve erba‘în ve elf. Şuhûdü’l-hâl: Mahmud Efendi b. Hasan, Ali Efendi b. İbrahim, Hüseyin Çelebi b. Ahmed el-Bevvâbü’s-sultânî, Hüseyin Beşe b. Yusuf, Mustafa b. Rıdvan, Mustafa b. Veli, Cafer b. Abdullah, Abdülkādir el-Muhzır ve gayruhüm.