Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 210 Hüküm no: 195 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Ali’nin, enseri bahasından Zakarya v. Kiragos’tan alacaklı olduğu Mahmiye-i İstanbul’da Fethiye mahallesi sükkânından Hüseyin b. Ali nâm kimesne meclis-i şer‘-i şerîf-i lâzımü’t-teşrîfde Zakarya v. Kiragos nâm zimmî muvâcehesinde üzerine da‘vâ ve takrîr-i kelâm edip mezbûr Zakarya zimmetinde yedimden müşterâ ve makbûz her vakıyyesi yirmi ikişer akçeye olmak üzre yüz yetmiş iki vakıyye enseri bahâsından üç bin beş yüz altmış dört akçe hakkım vardır suâl olunup alıverilmesi matlûbumdur dedikde gıbbe’s-suâl mezbûr Zakarya cevâbında müdde‘î-i mezbûra enseri bahâsından üç bin beş yüz altmış dört akçe deyni olduğunu tâyi‘an ikrâr etmeğin alâ mûcebi ikrârihî meblağ-ı mezbûr üç bin beş yüz altmış dört akçeyi müdde‘î-i mezbûr Hüseyin’e edâ ve teslîme mezbûr Zakarya’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Mehmed Beşe b. Ramazan, Hasan Çelebi b. ( ), Veli b. Mahmud, Resul b. ( ).