Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 130 Hüküm no: 114 Orijinal metin no: [17a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Nasrullah Efendi b. merhûm Şeyh Ömer Efendi’nin dükkanlarını Mustafa Ağa Vakfı’na istiğlâl yoluyla sattığı Medîne-i Ebî Eyyûb el-Ensârî -radıyallâhu te‘âlâ anhu- mahallâtından Câmi‘-i Kebîr mahallesinde sâkin olan kıdvetü’l-vâ‘izîn umdetü’n-nâsihîn Şeyh Nasrullah Efendi b. merhûm Şeyh Ömer Efendi -zîde takvâhu- meclis-i şer‘-i şerîfde hâzır olup âtiyyü’z-zikr dükkânlarını merhûm Mustafa Ağa vakfı’na mütevellî olan, hadâik-i sultâniyyeden Viros karyesinde vâki‘ bahçede üstâd olan hâmil-i hâze’l-kitâb Yusuf Bey b. Abdullah’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûr Şeyh Nasrullah Efendi’nin işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bâyi‘-i mezbûrun vakıf arâzi üzerine kendisi için inşâ ettiği ve evinin altında vâki‘ dükkânlarını evâmir-i sultâniyye ile bilâd-ı İslâmiye’de tedâvülde bulunan râyicü’l-vakt seksen kıt‘a sikke-i harbiyye-i fıddiyye mukābili ki her bir sikke yetmiş beş akçe eder ve ayrıca yirmi beşerlik ta‘bîr edilen sikkeden yüz seksen kıt‘a sikke-i harbiyye ve seksen eşrefî altın ki bunların her biri iki yüz elli akçe eder cem‘an yirmi bin akçe semen-i mu‘ayyen-i makbûzla ondan iştirâ etti. Mütevellî-i mezbûr, vâki‘ ikrârı vicâhen ve şifâhen tasdîk etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr târihden bir sene tamâmına iki bin dört yüz akçe ücret ile menzil-i mezbûru kirâya verdi. Sonra müderrisîn-i kirâmdan mukırr-ı mûmâ ileyhin karındaşı Avnullah Efendi b. merhûm Şeyh Ömer Efendi ve mukırr-ı müşârün ileyhin oğlu Abdüllatîf Efendi’nin her biri, dekâkîn-i merkūmînin derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’l-hâmis aşer min Cumâdelâhire sene seb‘a ve erba‘în ve elf. Şuhûdü’l-hâl: Hatîb Hüseyin Efendi, müezzin el-Hâc Hamza, Mu‘allim Mustafa Halîfe, İmâm Ebûbekir Efendi, arpacı Ali Bey, Hasan Beşe b. (…), muharrirü’l-hurûf Abdülkādir