Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 132 Hüküm no: 118 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muslihiddin b. Ebûbekir’in boşandığı Emine bt. Hüseyin ve annesi Rabia’nın mallarını çalmadığına yemin etmesi Medîne-i Hazret-i Ebî Eyyûb el-Ensârî mahallâtından Zeyneb Hâtun mahallesinde sâkine Emine bt. Hüseyin nâm hâtun meclis-i şer‘-i hatîr-i lâzımü’t-tevkīrde zevc-i mutallıkı Muslihiddin Subaşı b. Ebûbekir muvâcehesinde üzerine takrîr-i da‘vâ edip mezbûr Muslihiddin Subaşı beni tatlîk etmezden mukaddem sâkine olduğum menzilin duvarı içinde mahfûz olan iki bin nakid akçeyi ve bir tek üç ayaklı altın küpeyi ve on beş aded sîm kuşak bâftesini ahz etmişdir, suâl olunup ihkāk-ı hak olunması matlûbumdur deyip ve mezbûre Emine’nin vâlidesi Râbia bt. Mustafa nâ[m] hâtun dahi kezâlik Muslihiddin Subaşı muvâcehesinde üzerine takrîr-i da‘vâ edip mezbûr Muslihiddin Subaşı benim dahi mahall-i mezbûrdan üç bin nakid akçemi ahz etmişdir, suâl olunsun dedikde gıbbe’s-suâl akībe’l-inkâr mezbûretân Emine ve Râbia’dan da‘vâlarına mutâbık beyyine taleb olundukda beyyineden aczleri olup merkūm Muslihiddin Subaşı’yı istihlâf etmeler ile mahall-i mezbûrdan zikr olunan nukūd ve sâir eşyâyı ahz eylemediğine merkūm Muslihiddin Subaşı’ya yemîn teklîf olundukda alâ vefki’l-mes’ûl yemîn billâhi’l-aliyyi’l-azîm etmeğin mâ vaka‘a gıbbe’t-taleb ketb olundu. Fi’l-yevmi’l-hâmis aşer min Cumâdelâhire li sene seb‘a ve erba‘în ve elf. Şuhûdü’l-hâl: Mustafa Beşe b. Mahmud, Mahmud b. Ahmed, Mustafa b. Veli, Cafer b. Abdullah, Ali Beşe b. Abdullah Ser-oda, Ahmed Beşe b. ( ) mumcu.