Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 133 Hüküm no: 119 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Dimitri’nin Ahmed Beşe b. Abdullah’a sattığı tarladan patlıcan kesip satmadığına yemin etmesi Bostancı tâifesinden Ahmed Beşe b. Abdullah nâm kimesne meclis-i şer‘-i hatîr-i lâzımü’t-tevkīrde Franko v. Dimitri nâm zimmî muvâcehesinde üzerine takrîr-i da‘vâ edip mezbûr Franko bundan akdem karye-i Azadlı’da vâki‘ bâzincan bostanını üç bin akçeye bana bey‘ ve teslîm edip ben dahi tesellüm ve kabûl ve kabz eyledikden sonra mezbûr Franko zikr olunan bostandan bâzincan kat‘ edip âhara bey‘ etmişdir suâl olunup ihkāk-ı hak olunması matlûbumdur dedikde gıbbe’s-suâl ve akībe’l-inkâr müdde‘î-i mezbûrun müdde‘âsına mutâbıka beyyine taleb olundukda ityân-ı beyyineden âciz olup istihlâf etmeğin mezbûr Franko zikr olunan bostandan bâzincan kat‘ etmeyip ve âhar kat‘ ettirmediğine yemîn billâhi’llezî enzele’l-İncîle alâ İsa aleyhi’s-selâm etmeğin mâ vaka‘a gıbbe’t-taleb ketb olundu. Fi’l-yevmi’r-râbi‘ aşer min Cumâdelâhire li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Mustafa, Cafer b. Abdullah, Mustafa Beşe b. Mahmud, Mustafa b. Veli.