Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 133 Hüküm no: 120 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahuda v. Abraham’ın bahçesini Mahmud Bey b. Mehmed’e sattığı Yahud tâifesinden Kordava cemâ‘atinden olup bundan akdem Havâss-ı Aliyye kazâsı müzâfâtından Hasköy sâkinlerinden iken celâ-yı vatan edip hâlâ mahrûse-i Mısır’da Benî Suren mahallesinde mütemekkin eden Yahuda v. Abraham tarafından husûs-ı âti’z-zikre vekîl olup hasm-ı câhid mahzarında nehc-i şer‘î üzre vekâleti sâbite olan mezbûr Yahuda’nın dâmâdı Lazar v. Yasef nâm Yahudi mahfil-i kazâda işbu sâhibü’l-kitâb Mahmud Bey b. Mehmed nâm sarrâc-ı sultânî mahzarında bi’l-vekâle ikrâr-ı tâm ve takrîr-i kelâm edip müvekkil-i mezbûrun karye-i merkūmede vâki‘ bir tarafı ba‘zan Karnikos Pilsof nâm Yahudi mülkü ve ba‘zan Abraham v. Nikol nâm Yahudi mülkü ve bir tarafı Yahudi kilisesi ve bir tarafı kâfir makberesi ve bir tarafı müvekkil-i mezbûrun mülk menzili ile mahdûd olup etrâf-ı erba‘adan taş duvarı ve kasrı ve üç bi’r-i mâyı ve eşcâr-ı müsmire-i mütenevvi‘ayı müştemil olan bennâ zirâ‘ı ile tûlen yetmiş bir buçuk zirâ‘ ve arzen elli altı zirâ‘ bi hesâb-ı şatrancî üç bin dokuz yüz yetmiş altı buçuk zirâ‘ mülk bahçeyi mûmâ[-ileyh] müvekkil-i mezbûrun beynimizde ma‘lûm eski havlu kapısından olmak üzre tâmmü’l-vezn ve sahîhü’l-ayâr altı yüz kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan meblağ-ı merkūm altı yüz kıt‘a riyâlî guruşu merkūm Mahmud Bey yedinden vekâletim hasebiyle bi’t-tamâm ve’l-kemâl ahz ve kabz eyledim ba‘de’l-yevm zikr olunan bahçede müvekkil-i mezbûrun alâka ve medhali kalmayıp mezbûr Mahmud Bey’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde vekîl-i mezbûrun vech-i meşrûh üzre cârî olan ikrâr ve takrîri müşterî-i mezbûr Mahmud’un vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis aşer min Cumâdelâhire li sene seb‘a ve erba‘în ve elf. Şuhûdü’l-hâl: Mehmed Efendi b. Mustafa el-İmâm, Hüseyin b. Mahmud es-Sarrâcü’s-sultânî, Mehmed b. Mustafa el-Bevvâbü’s-sultânî, Mahmud Ağa b. Mi[r]za, Ahmed b. Mustafa el-Hammâmî, Mehmed b. Mustafa Ser-bölük, Mustafa b. Halil, Minnet b. Pürkadem, Mustafa b. Ali, Mehmed b. Arslancık, el-Hâc Yahya b. ( ) el-Hallâk, Cafer b. Abdullah, Yakub b. Kurd ve gayruhüm.