.:: İstanbul Kadı Sicilleri ::.


Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638)
cilt: 25, sayfa: 134
Hüküm no: 121
Orijinal metin no: [18b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yano v. Niko’nun evini Kiro v. Dimo’ya sattığı

Vilâyet-i Rumeli’nde Delvine kazâna tâbi‘ Kostantin nâm karyeden Yano v. Niko nâm zimmî mahfil-i kazâda râfi‘-i hâze’l-kitâb Kiro v. Dimo nâm zimmî muvâcehesinde bi tav‘ihî ikrâr ve i‘tirâf edip karye-i mezbûrede vâki‘ işbu akd-i âtî sudûruna değin silk-i mülk-i sahîhimde münselik olup bir tarafdan ba‘zan Pasko mülkü ve ba‘zan cebel ve bir tarafdan Yano v. Nika mülkü ve bir tarafdan yine benim mülküm ve bir taraf-ı râbi‘den tarîk-i âm ile mahdûd bir bâb tahtânî beyti ve zât-ı eşcâr-ı müsmire ve gayr-ı müsmireli bahçeyi müştemil mülk menzilimi, mezbûr Kiro’ya fıddî râyic fi’l-vakt dört bin akçe[ye] bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl ettikden sonra kabz-ı semen edip mebî‘-i merkūmu mahallinde ahz ve kabza merkūm Kiro’yu taslît eyledim ba‘de’l-yevm menzil-i merkūm mezbûr Kiro’nun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırr-ı merkūm Yano’nun ikrâr-ı meşrûhunu el-mukarru lehü’l-merkūm Kiro vicâ[hen] tasdîk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ aşer min Cumâdelâhire li sene seb‘a ve erba‘în ve elf.


Şuhûdü’l-hâl: Yakub b. Kurd, Mahmud b. Ahmed, Ali Beşe b. Abdullah, Mustafa b. Veli, Kiti v. Dimo, Maron [v.] Yani, Köni v. Nikola, Kiro [v.] Taranç, Kiro [v.] Vanko, Kiti [v.] Toma ve gayruhüm.