Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 135 Hüküm no: 122 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Seydi b. Ali’nin Abdülbâki Efendi Camii arsasından bir mezar yeri aldığı Medîne-i Hazret-i Ebî Eyyûb el-Ensârî mahallâtından Mehmed Ağa mahallesinde sâkine el-Hâc Seydi b. Ali mahfil-i kazâda hâfız-ı hâze’l-kitâb a‘lemü’l-ulemâ’i’l-izâm efdalü’l-fuzalâ’i’l-fihâm Abdurrahman Efendi neclü’l-mevâlî el-merhûm ed-dâricü ilâ medârici -rahmeti Rabbihi’l-gafûr- Abdülbâkī Efendi hazretlerinin taraf-ı şerîflerinden ikrâr-ı âti’z-zikri tasdîka vekîl olup nehc-i mu‘teber üzre şer‘an vekâleti sâbite olan zahrü’l-emâsil Sünbül Ağa b. Abdullah mahzarında bi tav‘ihî ikrâr ve i‘tirâf edip hazret-i müşârün-ileyh câmi‘-i şerîfinin mihrâbı önünde vâki‘ müşârün-ileyh hazretleri evkāf-ı şerîfesinden olup tahdîd ve tavsîfden müstağnî olan bir meza[rlık] arsayı medfen îcâr etmek için mukaddemâ evkāf-ı mezbûre mütevellîsinden tefevvuz etmiş idim hâlâ ben dahi müvekkil-i müşârün-ileyh efendi hazretlerine sekiz bin beş yüz akçe bedel-i tefvîz ve mütevellî-i vakf ma‘rifetiyle tefvîz edip ol dahi vech-i muharrer üzre tefevvuz ve kabûl eyledikden sonra meblağ-ı mezbûr sekiz bin beş yüz akçeyi bi tamâmihî alıp kabz eyledim dedikde mukırr-ı mezbûr Seydi’nin minvâl-i muharrer üzre cârî olan ikrârını vekîl-i merkūm Sünbül Ağa vicâhen tasdîk ve şifâhen tahkīk edicek mâ vaka‘a ketb olundu. Hurrire fi’l-yevmi’l-hâmis aşer min Cumâdelâhire li sene seb‘a ve erba‘în ve elf. Şuhûdü’l-hâl: Yusuf b. Musli, Musli b. İsmail, Mustafa Çelebi, Abdülkādir Çelebi b. Mehmed Efendi, Cafer b. ( ).