Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 135 Hüküm no: 123 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Başka yerde tekrar inşa edilen Bâli Hoca mescidinin masraf keşfi Medîne-i Hazret-i Ebî Eyyûb el-Ensârî mahallâtından Sivripınar nâm mahalde vâki‘ merhûm Bâli Hoca[’nın] binâ eylediği tahtadan çatma mescid-i şerîfin mahallesi bi’l-külliye harâb olmağla mescid-i mezbûr sahrâda kalıp vechen mine’l-vücûh ikāmet-i salât olunmak imkân olmadığından gayrı içinde ba‘zı ehl-i fesâd hilâf-ı şer‘-i şerîf nice ef‘âl-i kabîha eyledikleri ecilden mescid-i mezbûr mahall-i merkūmdan ref‘ olunursa medîne-i mezbûrede mescide ihtiyâc mukarrer olan Câmi‘-i Kebîr ile Çavuş Kasım câmi‘i mâbeyninde vâki‘ merhûm[e] Hânende Hâtun mu‘allimhânesi hareminde müstağnî-anh olan arsa üzerine vaz‘ olunmak üzre fermân-ı şerîf vârid olmağın mûceb-i fermân-ı âlî mescid-i mezbûrun mütevellîsi olan Hüseyin Çelebi mescid-i mezbûru mahall-i merkūmdan ref‘ edip zikr olunan mu‘allimhânenin hareminin sâlifü’z-zikr arsa üzerine mütevellîsi ma‘rifetiyle vaz‘ eyledikden sonra vâki‘ olan harc ve sarfını tahmîn ve takvîm olunmak taleb eylemeğin savb-ı şer‘-i kavîmden mevlânâ Mustafa Efendi irsâl olunup ol dahi hâssa mi‘mâr üstâd Musli Çelebi b. Hüsameddin ve zeyl-i kitâbda muharrerü’l-esâmî olan müslimîn ile zikr olunan mescid-i şerîfin üzerine varıp keşf ve müşâhede eylediklerinde mescid-i mezbûrun binâ olunan sakfı ve tuğla döşemesi ve mihrâbı ve tavanı ve nakkāşı ve mahfili ve minâresi ve sâir cüz’î ve küllî meremmâtı için ba‘de’l-mesâha ve’t-takvîm on üç bin altı yüz seksen akçe tahmîn olunup ebniye-i merkūmenin meblağ-ı merkūma tahammülü olduğuna mi‘mârı- mezbûr ve sâir ahâlî icmâ‘ ve ittifâk ettiklerinden sonra meblağ-ı merkūm on üç bin altı yüz seksen akçenin üç bin akçesi mescid-i mezbûrun nukzunun ziyâdesinden üç bin akçeye mütevellî-i mezbûr yedi ile bey‘ olunan nukz bahâsından hâsıl olup müteve[llî-i] mezbûr kendi harc ve sarfı cem‘an on bin altı yüz seksen sekiz akçe kaldığını mevlânâ-yı mezbûr mahallinde ketb ve tahrîr ba‘dehû meclis-i şer‘de alâ vukū‘ihî ihbâr ve takrîr etmeğin mâ vaka‘a gıbbe’t-taleb ketb olundu. Hurrire fi’l-yevmi’r-râbi‘ min Rebî‘ulâhir li sene seb‘a ve erba‘în ve elf. Şuhûdü’l-hâl: Mehmed Çelebi b. eş-Şeyh Mahmud, Mustafa Çelebi b. ( ), Derviş Çelebi b. Ali, Mehmed b. Abdi, Mustafa b. Abdullah, Osman b. Abdullah, Hasan Halîfe b. ( ) Mehmed, Mehmed b. Hasan, Mahmud Halîfe b. İbrahim [b.] Tayyib.