Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 136 Hüküm no: 124 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Yani’nin bağlarını Minho v. Kiro ile kardeşi Duşe’ye sattığı Medîne-i Rumeli’nde Avlonya sancağında Delvine kazâsına tâbi‘ Nice nâm karye sâkinlerinden Kiro v. Yani nâm zimmî mahfil-i kazâda işbu bâ‘isü’l-kitâb Minho v. Kiro ve karındaşı Duşe nâm zimmîler muvâcehelerinde ikrâr-ı tâm ve takrîr-i kelâm edip karye-i mezbûre sınırında vâki‘ bir tarafdan Papa Lika bağı ve bir tarafdan Nikola bağı ve bir tarafdan mezbûrân Minho ve Duşe bağları ve bir tarafdan tarîk-i âm ile mahdûd tahmînen altı çapalık bir kıt‘a ve yine bir tarafdan Yani Dikro bağı ve bir tarafdan Marterlice v. Derkoç bağı ve bir tarafdan mezbûrân bağları ve bir tarafdan tarîk-i âm ile mahdûd tahmînen üç çapa bir kıt‘a mülk bağları mezbûrân Minho ve Duşe’ye ale’l-iştirâki’s-seviy fıddî râyic fi’l-vakt dört bin akçeye bâtten bey‘ ve temlîk edip onlar dahi vech-i muharrer üzre iştirâ ve temellük eylediklerinden sonra semeni mezbûr dört bin akçeyi mezbûrân yedlerinden tamâmen ahz ve kabz edip mebî‘ayn-i mezbûreyni mahallinde kabza mezkûrân Minho ve Duşe’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâdî ve’l-ışrîn min Cumâdelâhire li sene seb‘a ve erba‘în ve elf. Şuhûdü’l-hâl: Ali Beşe b. Abdullah, Ahmed b. Bayram, Mustafa b. Ahmed, Mustafa b. Veli, Hırso v. Kiti, Dimo v. Yani, Lika v. Kiro, Papa İstamol, Andro [v.] Duka, Kika [v.] Askari, Yani [v.] Lika Marko, Frani [v.] Nika, Lika [v.] Todori, Yani [v.] Papa Andriye, Kiro [v.] Yani, Andriye v. Yani.