Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 143 Hüküm no: 136 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arkalyos v. Marodi’nin varisleri arasında sulh sağlandığı Havâss-ı Refî‘a kazâsı müzâfâtından Hasköy’de sâkin iken bundan akdem hâlik olan Arkalyos v. Marodi nâm zimmînin verâseti zevce-i metrûkesi ve vârisesi Kokana bt. Kostantin ve sulbiye sagīre kızı Resniye ve li ebeveyn er karındaşı Angeli’ye münhasıra olup kable’l-kısme mezbûre Resniye dahi hâlike olup verâseti vâlidesi mezbûre Kokana’ya ve li üm karındaşı Zaharya nâm sagīr ve li ebeveyn ammi merkūm Angeli’ye münhasıra olduğu şer‘an mütebeyyin ve yirmi dört sehme münkasime olan münâsahaları mes’elesinde, yedi sehmi mezbûre Kokana’ya ve iki sehmi mezbûr Zaharya’ya ve on beş sehmi merkūm Angeli’ye isâbet eylediği müte‘ayyin oldukdan sonra sagīr-i merkūm Zaharya’nın tesviye-i umûruna kıbel-i şer‘den vasî nasb olunan vâlidesi merkūme Kokana tarafından husûs-ı âti’z-zikre vekîl olup hasm-ı câhid mahzarında Todori v. Manol ve Sofyanos v. Kiryaki nâm zimmîler şehâdetleri ile şer‘an vekâleti sâbite olan Yamandi v. Yanaki nâm zimmî mahfil-i kazâda hâlik-i merkūmun terekesine vâzı‘ü’l-yed olan işbu râfi‘ü’l-kitâb mezbûr Angeli muvâcehesinde bi’l-vekâle ikrâr ve i‘tirâf edip sihâm-ı mezbûre[den] merkūme Kokana ile sagīr-i mezbûr Zaharya’ya isâbet eden dokuz sehim hisse-i şer‘iyyeleri mukābelesinde sagīr-i mezbûr hakkında dahi nef‘i olmağla hâlik-i merkūm Arkalyos’un muhallefâtından merkūm Angeli ile otuz iki bin nakd-i râyic fi’l-vakt fıddî akçe üzerine inşâ-i akd-i sulh eyleyip bedel-i sulh olan meblağ-ı mezbûr otuz iki bin akçeyi vekâlet-i mahkiyem hasebiyle merkūm Angeli yedinden bi’t-tamâm ve’l-kemâl ahz ve kabz edip müvekkile-i merkūme Kokana’ya îsâl eyledim min ba‘d hâlik-i merkūmun muhallefâtına müte‘allik da‘vâdan Hasköy’de vâki‘ mahzenin beş yıllık icâresi da‘vâsından müvekkile-i mezbûre asâleten ve vesâyeten mezbûr Angeli’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi ba‘de’l-yevm müvekkile-i merkūmeden husûs-ı mezbûra müte‘allik bi’z-zât ve bi’l-vâsıta da‘vâ sudûr ederse lede’l-hükkâmi’l-kirâm mesmû‘a ve makbûle olmaya dedikde vekîl-i mezbûrun minvâl-i meşrûh üzre cârî ve sâdır olan ikrâr ve i‘tirâfını el-mukarru lehü’l-merkūm Angeli vicâhen ve şifâhen tahkīk ettikden sonra meblağ-ı mezbûr otuz iki bin akçeden sagīr-i mezbûr Zaharya’nın hissesine yedi bin yüz on bir akçe isâbet etmeğin mâ hüve’l-vâki‘ gıbbe’t-taleb ketb olundu cerâ zâlik. Tah[rî]ren fî yevmi’l-âşir min Recebi’l-ferd li sene seb‘a ve erba‘în ve elf. Şuhûdü’l-hâl: Es-Sâbikūn.