Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 144 Hüküm no: 137 Orijinal metin no: [21a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angeli v. Mavridi’nin mahzenini Yani Yorgo Angeli ve Mihal’e kiralaması [derkenâr] Mezbûrlar rızâları ile fesh-i icâre etmeleri ile hüccet-i mezkûre ibtâl olunmuşdur. [mühür]. Havâss-ı Refî‘a kazâsı müzâfâtından Hasköy demekle ma‘rûfe karyede sâkin Angeli v. Mavridi nâm zimmî mahfil-i kazâda ashâb-ı hâze’l-kitâb Yani v. Vero ve Yo[r]go v. Mihal ve Angeli v. Dimitri ve Mihal v. Yani nâm zimmîler muvâcehelerinde ikrâr ve takrîr-i kelâm edip karye-i mezbûrede vâki‘ bir tarafı Kapı ağası mülkü ve bir tarafı Mihayil mülkü ve bir tarafı sâhil-i bahr ve bir tarafı tarîk-i âm ile mahdûd mülk mahzenimi târih-i kitâb senesi Zilhiccesinin yirminci gününden bir sene [21b] tamâmına değin mezbûrûn Yani ve Yorgo ve Angeli ve Mihal’e ale’l-iştirâk yirmi dört bin nakd-i râyic fi’l-vakt fıddî akçeye îcâr ve meblağ-ı mezbûr yirmi dört bin akçeyi ber vech-i peşîn yedlerinden bi’t-tamâm ahz ve kabz eyledim onlar dahi zikr olunan mahzeni minvâl-i meşrûh üzre istîcâr ve kabûl eylediler dedikde mukırr-ı merkūm Angeli’nin vech-i muharrer üzre cârî ve sâdır olan ikrâr ve takrîrini el-mukarru lehümü’l-merkūmûn Yani ve Yorgo ve Angeli ve Mihal vicâhen tasdîk ve şifâhen tahkīk ettikden sonra mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.