Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 145 Hüküm no: 138 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çelebi b. Abdullah’ın varislerinden Rabia’nın terekenin taksimi sırasında kardeşi Hatice’den mal gizlemediği Mahmiye-i İstanbul’da merhûm Mahmud Paşa câmi‘-i şerîfi kurbunda vâki‘ Cezerî Kasım Paşa mahallesinde sâkin iken bundan akdem vefât eden merhûm Yusuf Çelebi b. Abdullah nâm müteveffânın verâseti sulbiye kebîr kızları Hatice ve Râbia nâm hâtunlara münhasıra olduğu şer‘an mütebeyyin oldukdan sonra mezbûre Hatice tarafından husûs-ı âti’z-zikre vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Alemüddin Halîfe b. Süleyman el-İmâm ve Sefer Efendi b. Veli el-İmâm şehâdetleri ile şer‘an vekâleti sâbite olan fahrü’l-kuzât Ahmed Efendi b. Mehmed mahfil-i kazâda müteveffâ-yı mezbûrun muhallefâtına vâzı‘atü’l-yed olan mezbûre Râbia Hâtun tarafından dahi vekîl-i mezbûr ile husûmete ve redd-i cevâba vekîl olup mezbûreyi ma‘rifet-i şer‘iyye ile ârifeyn olan Sâlih Bey b. Mahmud ve Nasuh Halîfe b. Hızır şehâdetleri ile vekâleti sâbite olan Ali Bey b. Mehmed mahzarında bi’l-vekâle üzerine takrîr-i da‘vâ edip mezbûre Râbia Hâtun müteveffâ-yı mezbûrun mahalle-i merkūmede vâki‘ olan menzilinde mahfûz olan menkūlâtından hâric ez kısmet otuz üç bin beş yüz nakd-i râyic fi’l-vakt akçe ve bir samur kürk ve bir hatâyî kaftan ve üç kollu bir sîm devât ve dört sîm kılıç ve üç fağfurî fincan ve iki döşek ve iki minder ve üç yorgan ve dört yasdık ve iki kilim ve iki velense ve altı sahan ve üç tencere ve iki ibrik ve iki leğen ve iki kahve ibriği ve bir minder kebesi ve beş çarşaf ve bir güğüm ve bir çadır ve üç mısır hasırı ve bir tas ve yüz aded mercan tesbih ve yüz aded bir yeşim tesbih ve beş aded fağfurî tabak ve on altı bin beş yüz akçe kıymetli Gülistan nâm bir câriyeyi müvekkile-i mezbûre Hatice Hâtun’dan hîn-i kısmetde ihfâ eyledi hâlâ suâl olunup eşyâ-i mezbûreden müvekkile-i mezbûreye isâbet eden hisse-i şer‘iyyesi alıverilmek matlûbumdur dedikde gıbbe’s-suâl vekîl-i mezbûr Ali Bey müvekkile-i mezbûre Râbia Hâtun mezbûre Gülistan’ı kendi malıyla iştirâ eyleyip ve zikr olunan yeşim tesbih [ve] beş kıt‘a fağfurî tabak müvekkile-i mezbûrenin zevci Ahmed Bey mülkü olup ve sâlifü’z-zikr mercan tesbih dahi müvekkile-i mezbûrenin vâlidesi İnâyetullah bt. Abdullah nâm hâtunun mülkü olmağla dâmâdı mezbûr Ahmed Bey’e hibe eylemiş idi deyip meblağ-ı mezbûru ve sâir eşyâ-i merkūmeyi bi’l-külliye inkâr ile cevâb vericek müdde‘î-i mezbûrdan takrîrine mutâbık beyyine taleb olundukda ityân-ı beyyineden âciz olup istihlâf etmeğin mahkeme-i şerîfe kâtiblerinden mevlânâ Abdülkādir Efendi b. Mehmed Efendi irsâl olunup ol dahi zeyl-i kitâbda mastûrü’l-esâmî olan müslümanlar ile medîne-i Hazret-i Ebî Eyyûb el-Ensârî mahallâtından Şah Sultan mahallesinde vâki‘ vekîl-i mezbûr Ali Bey’in menziline varıp müvekkile-i mezbûre Râbia Hâtun’a meblağ-ı mezbûru ve vekîl-i mezbûr Ali Bey’in inkâr ile cevâb verdiği sâir eşyâ-i mezkûreyi hîn-i kısmetde karındaşı merkūm Hatice Hâtun’dan bir tarîk ile ihfâ eylemediğine yemîn teklîf eylediklerinde ol dahi alâ vefki’l-mes’ûl yemîn billâhi’l-aliyyi’l-azîm eylediğini mevlânâ-yı mezbûr ve zeyl-i kitâbda mastûrü’l-esâmî olan müslimîn ile gelip haber vermeğin mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Recebi’l-ferd li sene seb‘a ve erba‘în ve elf. Şuhûdü’l-hâl: Mahmud Çelebi b. Mehmed, Sâlih Bey b. Mahmud, İbrahim Efendi b. Receb, Mehmed b. Abdullah, Mehmed Halife b. Abdullah, Süleyman Sofu b. Abdullah, Yakub b. Kurd ve gayruhüm.