Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 146 Hüküm no: 139 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baba Haydar b. Abdullah’ın bağ ve tarlasını Hüseyin Efendi b. Davud’a sattığı Havâss-ı Aliyye kazâsı müzâfâtından Vidos nâm karye sâkinlerinden Baba Haydar b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Hüseyin Efendi b. Davud el-Hatîb mahzarında bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Mehmed bağı ve bir tarafdan Davud bağı ve bir tarafdan Abdi Dede tarlası ve bir tarafdan Ali Bey tarlası [ile] mahdûd tahmînen bir dönüm mikdârı bir kıt‘a mülk bağımı mezbûr Hüseyin Efendi’ye fıddî nakd-i râyic fi’l-vakt yedi yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra yine karye-i mezbûre hudûdu dâhilinde vâki‘ bir tarafdan Ali Bey tarlası [22a] ve bir tarafdan Yusuf üstâd mülkü ve bir tarafdan Bostancılar vakfı olan bağ ve bir tarafdan tarîk-i âm ile mahdûd merhûm ve mağfûrun-leh Sultan bayezid Hân vakfı arâzisinden tahmînen dört buçuk keyl tohum istî‘âb eder taht-ı tasarrufumda olan bir kıt‘a tarlamın dahi hakk-ı tasarrufunu sâhib-i arz ma‘rifetiyle vech-i meşrûh üzre tefevvuz ve kabûl eyledikden sonra semeni mezbûr yedi yüz akçe ile bedel-i tefvîz olan iki bin dokuz akçe ki cem‘an üç bin altı yüz akçeyi mezbûr Hüseyin Efendi’nin yedinden bi’t-tamâm ve’l-kemâl ahz ve kabz eyledim ba‘de’l-yevm mezbûr Hüseyin Efendi’nin zikr olunan bağ mülk-i müşterâsı ve tarla dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Recebi’l-ferd li sene seb‘a ve erba‘în ve elf. Şuhûdü’l-hâl: Yahya Halîfe b. Eyüb el-Müezzin, Abdullah Dede b. Abdullah, Osman b. Mustafa, Ali Bey b. Abdullah, Mehmed Çavuş, Hasan Bölükbaşı.