Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 147 Hüküm no: 140 Orijinal metin no: [22a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Beyti’nin evini istiğlâl yoluyla Şeyh Mahmud Efendi Vakfı’na sattığı Mahmiye-i Kostantıniyye mahallâtından Macuncu Kasım mahallesinde sâkine olan Kerime bt. Beyti nâm hâtun meclis-i şer‘-i şerîfde hâzıre olup âtiyyü’z-zikr menzilini merhûm Şeyh Mahmud Efendi vakfı’na mütevellî olan hâmil-i hâze’l-kitâb Şeyh Mehmed Efendi b. merhûm Şeyh Pîrî Efendi’ye bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûre Kerime hâtunun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan bir tarafdan Bestan Bey mülkü, diğer tarafdan Hüseyin Çelebi mülkü, öteki tarafdan Gonca Hâce mülkü ve diğer tarafdan da tarîk-i hâs ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe semen-i mu‘ayyen-i makbûzla iştirâ etti. Bâyi‘a-i mezbûrenin menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr târihden üç sene tamâmına bin sekiz yüz akçe ücret ile menzil-i mezbûru kirâya verdi. Mütevellî-i mezbûr, vâki‘ ikrârı vicâhen ve şifâhen tasdîk etti. Sonra mahalle-i mezbûre sükkânından Bestan b. Hasan ve Safiye bt. Ahmed nâm kimesneler menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’r-râbi‘ ve’l-ışrîn min şehri Recebi’l-ferd sene seb‘a ve erba‘în ve elf. Şuhûdü’l-hâl: Müezzin Murtaza Halîfe b. Mehmed, Şeyhî Çelebi b. Hüseyin, Oruc Halîfe b. Şaban, Mehmed Halîfe b. Ramazan, Ahmed b. Mehmed, Hüseyin Çelebi