Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 147 Hüküm no: 141 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazal v. Avadik’in bağ ve ağaçlarını Agop v. Sagar’a sattığı Vilâyet-i Anadolu’da Arapkir sancağında vâki‘ kasaba-i Eğin mahallâtından Kolca mahallesinde sâkin Gazal v. Avadik nâm Ermeni mahfil-i kazâda işbu râfi‘ü’l-kitâb Agop v. Sagar nâm Ermeni muvâcehesinde bi’t-tav‘i’s-sâf ikrâr ve i‘tirâf edip kasaba-i mezbûre kurbunda Tekreter nâm mevzi‘de vâki‘ bir tarafı mezbûr Agop bağı ve bir tarafı Ali Bey bağı ve bir tarafı su harkı ve bir tarafı İsak bağı ile mahdûd olan bir kıt‘a bağ babam hâlik-i merkūmdan bana ve âhar karındaşım Avadik’e ve babam merkūm o dahi hâlik oldukda küfür üzerine olup hâlâ şeref-i İslâm ile müşerref olan diğer karındaşım Hasan’a intikāl edip lâkin zikr olunan bağdan ve etrâfında vâki‘ olan durt [dut?] ağaçlarından karındaşım merkūm Hasan’a isâbet eden sülüs-i şâyi‘ini dahi mezbûrdan ben iştirâ etmeğin sülüsânı benim ve sülüs-i âharı âhar karındaşım mezbûr Avadik’in mülkü olan sâlifü’z-zikr bağdan ve durt [dut?] ağaçlar[ın]dan mezbûr Hasan’ın iştirâ eylediğim sülüs-i şâyi‘ini hâlâ mezbûr Agop’a tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile altmış beş kıt‘a riyâl kebîr guruşa bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı merkūm altmış beş kıt‘a riyâl kebîr guruşu yedinden bi’t-tamâm ve’l-kemâl ahz ve kabz eyleyip mârrü’z-zikr bağın ve durt [dut?] ağaçlarının sülüs-i şâyi‘ini mahallinde zabt ve teslîme müşterî-i merkūm Agop’u taslît eyledim ba‘de’l-yevm mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’l-hâmis ve’l-ışrîn min şehri Recebi’l-ferd li sene seb‘a ve erba‘în ve elf. Şuhûdü’l-hâl: Mehmed b. Abdullah, Hasan b. Abdullah, Cafer b. Uğurlu, Galaz v. Zargon, İsak v. Mardiros, Haçok v. Agop, Mardiros v. Devletyar, Bayik v. Manos, Yani v. Yakob, Gazal v. Altun, Merzak v. Metrak, Gazal v. Toros, Yorgos v. Bostan, Agnar v. Serkis ve gayruhüm.