Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 148 Hüküm no: 142 Orijinal metin no: [22a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Bekir’in çayırlığını Arslan b. Sinan’a sattığı Vilâyet-i Rumeli’nde Bihlişte kazâsına tâbi‘ Kuşniçe nâm karye sâkinlerinden Mehmed b. Bekir nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Arslan b. Sinan nâm kimesne mahzarında bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Saferto nâm sipâhi tarlası ve ba‘zan çeşme ve bir tarafdan Abdi nâm kimesne tarlası ile taht-ı tasarrufumda [22b] olan bir kıt‘a çayırımın hakk-ı tasarrufunu mezbûr Arslan’a sâhib-i arz ma‘rifetiyle sekiz yüz altı akçe mukābelesinde tefvîz edip ol dahi vech-i meşrûh tefevvuz ve kabûl eyledikden sonra bedel-i tefvîz olan meblağ-ı mezbûr sekiz yüz elli akçeyi mezbûr Arslan yedinden bi’t-tamâm ahz ve kabz edip zikr olunan çayırı mahallinde zabt ve tasarrufa mezbûr Arslan’ı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Recebi’l-ferd li sene seb‘a ve erba‘în ve elf. Şuhûdü’l-hâl: Hızır b. Sinan, Receb b. ( ), Hüseyin b. ( ), Sinan b. Ahmed, Timur Beşe b. Pîrî, Mustafa b. Veli.