Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 149 Hüküm no: 145 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Mehmed’in bahçesini Kemel, diğer Kemel, Abraham, İsak ve Yahuda’ya müştereken sattığı Havâss-ı Refî‘a kazâsı müzâfâtından Hasköy demekle ma‘rûf karyede sâkin Mahmud Bey b. Mehmed nâm sarrâc-ı sultânî mahfil-i kazâda ashâb-ı hâze’l-kitâb dırağman Kemel v. Kemel ve diğer Kemel v. Paroh ve Abraham v. Nikon ve İsak v. Abraham [ve Yahuda] nâm Yahudiler muvâcehelerinde bi’t-tav‘i’s-sâf ikrâr ve i‘tirâf edip karye-i merkūmede vâki‘ bir tarafı sâbıkan Yenişehir kadısı olan fazîletlü Abdürrahim Efendi hazretleri mülkü ve bir tarafı ba‘zan Karnikos Pilsof nâm Yahudi mülkü ve ba‘zan mezbûr Abraham v. Nikon mülkü ve bir tarafı Yahudi kilisesi ve bir tarafı mekābir-i Nasârâ ile mahdûd olup etrâf-ı erba‘ası taş duvarı ve bir tahtânî kasrı ve üç bi’r-i mâyı ve eşcâr-ı müsmire-i mütenevvi‘ayı müştemil olan bennâ zirâ‘ı ile tûlen yetmiş bir buçuk ve arzen elli altı zirâ‘ bi hesâb-ı şatrancî üç bin dokuz yüz yetmiş altı buçuk zirâ‘ mülk bahçemi mezbûrûn dırağman Kemel ve diğer Kemel ve Abraham ve İsak ve Yahuda’ya tâmmü’l-vezn ve sahîhü’l-ayâr yedi yüz kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile ale’l-iştirâki’s-seviy bey‘ ve teslîm edip onlar dahi vech-i muharrer üzre iştirâken iştirâ ve tesellüm eylediklerinden sonra semeni olan mezbûrü’n-na‘t yedi yüz kıt‘a riyâlî guruşun altı yüz kıt‘ası zimmetimde mütekarrir olup mezbûrûna edâsı lâzım olan altı yüz kıt‘a riyâlî guruş deynime takās eyleyip bâkī yüz kıt‘a riyâlî guruşu yedlerinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bahçede benim alâka ve medhalim kalmayıp mezbûrûn Yahudilerin ale’l-iştirâki’s-seviy mülk-i müşterâları olmuşdur, keyfe mâ yeşâ’ûn ve yahtârûn mutasarrıf olsunlar dedikde mukırr-ı merkūm Mahmud Bey’in vech-i meşrûh üzre cârî ve sâdır olan ikrâr ve i‘tirâfını el-mukarru lehümü’l-merkūmûn dırağman Kemel ve diğer Kemel ve Abraham ve İsak ve Yahuda her biri vicâhen tasdîk ve şifâhen tahkīk eylediklerinde mâ hüve’l-vâki‘ gıbbe’t-taleb kayd olundu. Fi’l-yevmi’s-sâbi‘ ve’l-ışrîn min şehri Recebi’l-mürecceb li sene seb‘a ve erba‘în ve elf. Şuhûdü’l-hâl: Halil Efendi b. Zülfikār el-Müderris, Mehmed Efendi b. Mustafa el-İmâm, Mehmed Halîfe b. İbrahim el-Müezzin, Mahmud Bey b. Mirza el-Cündî, Mustafa Çelebi b. Halil es-Sarrâcü’s-sultânî, Abdi b. Şaban, Mehmed Bey b. Mustafa el-Bevvâbü’s-sultânî, Ahmed Çelebi b. Mustafa el-Hammâmî, Ali Beşe b. Ahmed, Mustafa b. Ali, el-Hâc Himmet b. Abdülhallak, Mehmed b. A[r]slancık, Münir b. Pürkadem, Mehmed b. Mustafa.