Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 151 Hüküm no: 147 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryaki v. Yani’nin celep taifesinden Dimo v. Niko’ya koyun satışından kalan parayı ödemesi Celeb tâifesinden Dimo v. Niko nâm zimmî mahfil-i kazâya Kiryaki v. Yani zimmîyi ihzâr ve mahzarında üzerine takrîr-i da‘vâ edip bundan akdem iki yüz kırk üç aded koyunlarımı Boğdan vilâyetinde merkūm Kiryaki’nin koyunlarına halt edip hâlâ İstanbul’a geldiğimizde zikr olunan iki yüz kırk üç aded koyunlarım[ı] mezbûr Kiryaki iznim ile mezbûr altmış birer akçeden cem‘an otuz dokuz bin yüz yirmi üç akçeye bey‘ edip meblağ-ı mezbûrdan otuz beş bin beş yüz yirmi üç akçesi mezbûr Kiryaki yedinden kabz edip bâkī mezbûr Kiryaki zimmetinde üç bin altı yüz akçe hakkım kalmışdır suâl olunup alıverilmek matlûbumdur dedikde gıbbe’s-suâl mezbûr Kiryaki cevâbında eğerçi mezbûr Dimo’nun iki yüz kırk üç aded koyunlarını Boğdan vilâyetinde koyunlarıma halt edip getirip İstanbul’da yüz altmış birer akçeye bey‘ eyledim lâkin meblağ-ı mezbûr üç bin altı yüz akçesin çoban harcına ihrâc eyledim deyicek mezbûr Dimo tekrâr iddi‘â edip benim koyunlarım baş koyunlar olup merkūm Kiryaki’nin koyunları alçak olmağla hîn-i bey‘de merkūm Kiryaki bana çoban harcını cemî‘an ben tahammül edeyim, senin koyunlarını benim koyunlarım ile ma‘an bey‘ edelim demiş idi dedikde gıbbe’s-suâl mezbûr Kiryaki inkâr edip mezbûr Dimo’nun beyyinesi olmamağla merkūm Kiryaki’yi istihlâf etmeğin mezbûr Kiryaki yemînden nükûl etmekle meblağ-ı mezbûr üç bin altı yüz akçeyi mezbûr Dimo’ya edâ etmeye mezkûr Kiryaki’ye tenbîh olunmağın mâ vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehr-i Recebi’l-ferd li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Veli, Cafer b. Abdullah, Yakub b. Kurd, Mustafa Beşe b. Mahmu[d], Mustafa b. Mehmed, Abdullah b. Mustafa.