Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 156 Hüküm no: 157 Orijinal metin no: [24a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasil v. İstati’nin tarlalarını Yani v. Angeli’ye sattığı Vilâyet-i Rumeli’nde cezîre-i Mora’da Kalavrita kazâsına tâbi‘ Gördos nâm karye sâkinlerinden Vasil v. İstati nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Yani v. Angeli nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd babam hâlik-i mezbûr İstati’den intikāl-i âdî ile bana intikāl edip taht-ı tasarrufumda olan beş kıt‘a tarlamın ve yine karye-i mezbûre kurbunda Mavramat nâm harâbe karye sınırında vâki‘ lede’l-ahâlî ve’l-cîrân ma‘lûmü’l-hudûd altı kıt‘a tarlamın ve bi’l-cümle taht-ı tasarrufumda olan tarlaların hakk-ı tasarrufunu sâhib-i arz ma‘rifetiyle mezbûr Yani’ye iki bin beş yüz akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr iki bin beş yüz akçeyi mezbûr Yani yedinden bi’t-tamâm ve’l-kemâl ahz ve kabz edip sâlifü’z-zikr olan tarlaları mahallinde zabt ve tasarrufa mezbûr Yani’yi taslît eyledim ba‘de’l-yevm mârrü’z-zikr tarlalar mezbûr Yani’nin dâhil-i taht-ı tasarrufu olmuşdur dedikde mukırr-ı mezbûr Vasil’in minvâl-i muharrer üzre cârî olan ikrârını el-mukarru lehü’l-mezbûr Yani vicâhen ve şifâhen tasdîk etmeğin mâ vaka‘a gıbbe’t-taleb ketb olundu. Tahrîren fî selhi Recebi’l-ferd li sene seb‘a ve erba‘în ve elf. Şuhûdü’l-hâl: Ali Beşe b. Yusuf, Bayram b. ( ), Angeli v. Dimitri, Dimo v. Nikola, Aleksandri v. Yorgi, Panayot, Apostol v. İstani ve gayruhüm.