Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 157 Hüküm no: 159 Orijinal metin no: [24a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakoni v. Yani’nin Beytülmal eminindeki alacağını tahsil ettiği Vilâyet-i Rumeli’nde kasaba-i Çorlu sükkânından iken mürd olan Yani v. ( ) nâm zimmînin sulbî oğlu ve hasren vârisi olan Yakoni nâm zimmî mahfil-i kazâda kasaba-i mezbûrede bin kırk altı şehri Recebi’nden sene tamâmına değin beytülmâl ve mâl-ı gāib ve mâl-ı mefkūd emîni olan râfi‘-i hâze’l-kitâb İbrahim Çavuş b. Kurd Çavuş muvâcehesinde bi tav‘ihî ikrâr ve takrîr-i kelâm edip babam mezbûr Yani mürd oldukda terekesinden mezbûr İbrahim Çavuş bi gayr-ı vech-i şer‘î yedi bin akçe ahz ve kabz eylemişidi hâlâ meblağ-ı mezbûr yedi bin akçeyi mezbûr İbrahim Çavuş’un yedinden bi’t-tamâm alıp kabz eyledim ba‘de’l-yevm bir akçe ve bir habbe alacağım kalmadı dedikde mukırr-ı mezbûr Yakoni’nin ikrâr-ı meşrûhunu mezbûr İbrahim Çavuş vicâhen ve şifâhen tasdîk ve tahkīk edicek mâ vaka‘a gıbbe’t-taleb ketb olundu. Hurrire fi’l-yevmi’s-sânî min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mustafa Çavuş b. Mehmed, Mustafa b. Ahmed, Mahmud b. Ahmed, Mehmed b. Rıdvan, Mustafa b. Ebûbekir, Mustafa b. Abdülhalim, Cafer b. Abdullah, Mustafa b. Veli, Mahmud b. Ahmed, Mustafa b. Veli, Ali b. Hamza, Yani v. Pavlo ve gayruhüm.