Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 158 Hüküm no: 160 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi’nin evlerini Abdülfettah b. Veli’ye sattığı Zü’l-hasebi’s-sâmî ve’n-nesebi’l-âlî sâbıkan revnak-ı sadr-ı Anadolu olan mevle’l-mevâlî a‘le’l-e‘âlî şerîfü’z-zât kerîmü’s-sıfât el-âmilü’l-âlimü’r-Rabbânî el-kâmilü’l-fâzılu’s-Samedânî sâhibü’l-me‘âlî ve’l-mefâhir vârisü’l-mecdi ve’ş-şeref kâbiren an kâbir el-mahfûf bi sunûfi avâtıfi’l-meliki’l-ma‘bûd hazret-i Ebü’l-fazl Mahmud Efendi neclü’l-mevle’l-merhûm tavdü’l-fezâ’il ve bahrü’l-ulûm ed-dâricü ilâ medârici rahmeti Rabbihi’l-gafûr Mehmed Efendi cânib-i şerîflerinden husûs-ı âti’z-zikri ikrâra vekîl olup hasm-ı câhid mahzarında bimâ hüve nehcü’s-sübût şer‘an vekâleti sâbite olan mevlânâ Ali Efendi b. Mustafa mahfil-i kazâda bi’l-fi‘l Niğbolu kadısı olan işbu sâhibü’l-kitâb fahrü’l-kuzât zahrü’l-vülât mevlânâ Abdülfettâh b. Veli tarafından ikrâr-ı âti’l-beyânı tasdîka vekâleti hasm-ı câhid mahzarında İshak Efendi b. Veli ve Veli Efendi b. ( ) şehâdetleri ile şer‘an sâbite olan Taşçızâde Mehmed Çelebi b. Ramazan mahzarında bi’l-vekâle ikrâr ve i‘tirâf edip müvekkilim mûmâ-ileyh hazretleri silk-i mülkünde muntazam olan emlâklerinden medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Takyecibaşı mahallesinde vâki‘ bir tarafı mezbûr İshak Efendi mülkü ve bir tarafı Kasab Mehmed Beşe mülkü ve bir tarafı tarîk-i hâs ve bir tarafı tarîk-i âm ile mahdûd olup muhavvata-i dâhiliyyesi iki bâb tahtânî beyti ve tahtapûşu ve matbahı ve bi’r-i mâ ve kenîfi ve zât-ı eşcâr-ı müsmire ve gayr-ı müsmire cüneyneyi ve muhavvata-i hâriciyye beyti iki bâb fevkānî ve iki bâb tahtânî beyti ve ahırı ve kenîfi ve mahzeni müştemil olan menzillerini, cümle tevâbi‘ ve levâhıkı ve âmme-i menâfi‘ ve merâfıkı ile müşârün-ileyh Abdülfettâh Efendi’ye doksan bin nakd-i râyic fi’l-vakt fıddî akçeye cânibeynden îcâb ve kabûlü hâvî bey‘-i bâtt-ı sahîh-i şer‘î ile bundan akdem bey‘ ve teslîm edip onlar dahi vech-i meşrûh üzre iştirâ ve tesellüm eylediklerinden sonra semeni olan meblağ-ı merkūm doksan bin akçenin elli bin akçesini mûmâ-ileyh Abdülfettâh Efendi yedinden ahz ve kabz eylemişler idi hâlâ meblağ-ı bâkī kırk bin akçeyi dahi vekîl-i mezbûr Mehmed Çelebi yedinden bi’t-tamâm ve’l-kemâl ahz ve kabz eylediler menzil-i mezbûrun semeninden mûmâ-ileyh Abdülfettâh Efendi zimmetinde bir akçe ve bir habbe bâkī kalmayıp ba‘de’l-yevm menzil-i mezbûr mülk-i müşterâları olmuşdur, keyfe mâ yeşâ’ ve yahtâr mutasarrıf olsunlar dedikde vekîl-i mezbûr Ali Efendi’nin minvâl-i muharrer üzre cârî ve sâdır olan ikrâr ve i‘tirâfını vekîl-i âhar Mehmed Çelebi vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis ve’l-ışrîn min şehri Recebi’l-mürecceb li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed el-Kadı, Dürrî Efendi b. Mustafa, Ömer Efendi b. Mehmed el-Hatîb, Mustafa Efendi b. Ahmed el-Hatîb, Ali Efendi b. İsrail el-Hatîb, Mustafa Halîfe b. Ebûbekir, Mustafa Halîfe b. Mehmed el-Müezzin, Mehmed Çelebi b. Pîrî el-Hatîb, Abdullah Çelebi b. Hasan, Abdurrahman Çelebi b. Habib el-Hammâmî, Ali Bey b. Mustafa, Mazhar Çelebi b. Mehmed, Hamza Bey b. Mehmed, Hasan Bey b. Abdullah, Ali Beşe b. Nasuh, Ahmed Çelebi el-Kayyım, Abdülkādir Çelebi b. Mehmed.