Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 159 Hüküm no: 161 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Avraham’ın evini Abdürrahim Efendi’ye sattığı [Derkenâr:] Bey‘-i mezkûr tarafeynin rızâları ile ikāle olunmağla hüccet-i mezkûr lağv olunmuşdur. [Mühür] Mahmiye-i Kostantıniyye -hamâhallâhu te‘âlâ ani’l-âfât ve’l-beliyye- de Sofular hamamı kurbunda sâkin a‘lemü’l-ulemâ’i’l-izâm efdalü’l-fuzalâ’i’l-fihâm hâvi’l-fürû‘ ve’l-usûl câmi‘ü’l-ma‘kūl ve’l-menkūl el-muhtassu bi mezîdi inâyetihi’l-meliki’s-samed Hazret-i Abdürrahim Efendi b. Mehmed tarafından ikrâr-ı âti’z-zikri tasdîka vekîl olup İbrahim Efendi b. Mehmed ve Abdülkādir Efendi b. Mehmed şehâdetleri ile şer‘an vekâleti sâbite olan Ali Efendi b. el-Hâc Abdullah muvâcehesinde Hazret-i Ebî Eyyûb el-Ensârî -radıyallâhu te‘âlâ anhu- kazâsı müzâfâtından Hasköy mahallâtından Keçeciler mahallesi sükkânından olup Yahud tâifesinden Kordava cemâ‘atinden Aslan v. Avraham nâm Yahudi tarafından menzil-i âti’z-zikri bey‘ ve kabz-ı semene vekîl olup bimâ hüve nehcü’s-sübût şer‘an vekâleti sâbite olan Lazari v. Yasef nâm Yahudi bi’l-vekâle ikrâr ve takrîr-i kelâm edip müvekkilim mezbûr Arslan’ın silk-i mülk-i sahîhinde münselik olan emlâkinden mahalle-i merkūmede vâki‘ bir tarafdan mekābir-i nasârâ tarafında olan tarîk-i âm ve bir tarafdan müvekkilim mezbûr Aslan’ın mülkü olup bundan akdem Mahmud Çelebi nâm kimesneye bey‘ eylediği hadîka ve bir tarafdan ba‘zan Aslan v. Mosi ve ba‘zan âhar Kordava v. Kavani nâm Yahudiler mülkleri ve bir tarafdan ba‘zan Yasef v. Avraham ve ba‘zan âhar tarîk-i hâs ile mahdûd üç tabaka odalar ki tabaka-i ulyâsı üç bâb oda ve bir selâmlık ve bir matbahı ve tabaka-i vustâsı iki bâb odayı ve sofayı ve tabaka-i süflîsi iki bâb odayı ve selâmlık ve matbahı ve nerdübân altında mahzeni ve hamam ve camekânı ve zât-ı eşcâr-ı müsmire ve gayr-ı müsmire hadîkayı ve hadîka köşesinde bir tahtânî şeşhâne odayı ve dört aded bi’r-i mâyı müştemil mülklerini, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık vekâlet-i mahkiyem hasebiyle müvekkil-i mûmâ-ileyh Abdürrahim Efendi hazretlerine yedi yüz aded riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘i [ile] bey‘ ve teslîm edip onlar dahi vech-i meşrûh üzre iştirâ ve tesellüm eyledikden sonra mezbûrü’n-na‘t yedi yüz aded riyâlî kebîr guruşu müşârün-ileyh Abdürrahim Efendi yedinden bi’t-tamâm ahz ve kabz eyledim ba‘de’l-yevm menzil-i merkūm mezbûr Abdürrahim Efendi’nin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mezbûr Lazari’nin minvâl-i meşrûh üzre bi’l-vekâle [25a] sâdır olan ikrârını vekîl-i âhar mezk[û]r Ali Efendi bi’l-vekâle vicâhen tasdîk ve şifâhen tahkīk etmeğin mâ hüve’l-vâki‘ ketb olundu. Tahrîren fi’l-yevmi’t-tâsi‘ aşer min Recebi’l-ferd li sene seb‘a ve erba‘în ve elf. Şuhûdü’l-hâl: Fahrü’l-kuzât Kasım Efendi b. ( ), Fahrü’l-müderrisîn Ebûbekir Efendi b. ( ), Ali Efendi b. Süleyman el-Müsta‘id, Abdi Beşe er-Râcil, Mehmed Çelebi b. ( ).