Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 160 Hüküm no: 162 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çavuş b. Mehmed Çavuş’un ortağı İbrahim Çavuş’tan hakkını aldığı Medîne-i Hazret-i Ebî Eyyûb el-Ensârî mahallâtından Çavuş Kasım mahallesi sâkinlerinden Mustafa Çavuş b. Mehmed Çavuş meclis-i şer‘-i hatîr-i lâzımü’t-tevkīrde işbu hâmilü’l-kitâb İbrahim Çavuş b. Kurd mahzarında ikrâr-ı tâm ve takrîr-i kelâm edip Vize ve Kırkkilise sancaklarında vâki‘ beytülmâl-i âmme ve hâssa ve mâl-ı gāib ve mâl-ı mefkūd emânetini mezbûr İbrahim Çavuş ile ale’l-iştirâki’s-seviy cânib-i mîrîden iltizâm ve der-uhde edip zabt etmiş idik hâlâ itmâm-ı hizmet edip muhâsebemiz gördüğümüze hizmet-i merkūmeden benim hisseme isâbet eden sekiz bin akçeyi mezbûr İbrahim Çavuş yedinden bi’t-tamâm ve’l-kemâl ahz ve kabz eyledim ba‘de’l-yevm hizmet-i mezbûreye müte‘allik mezbûr İbrahim Çavuş’dan da‘vâ talebim kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mahmud b. Ahmed, Mustafa b. Ahmed, Ali b. Mustafa, Cafer b. Abdullah, Siyâmi Efendi b. Tahir el-Müsta‘id, Hüseyin Dede b. Abdullah.