Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 213 Hüküm no: 201 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hasan’ın tarlasını kardeşi Osman’a sattığı Fi’l-asl vilâyet-i Rumeli’nde İstarova kazâsına tâbi‘ Seliçe nâm karyeden olup hâlâ mahmiye-i İstanbul’da ( ) mahallesinde sâkin Ali b. Hasan nâm kimesne meclis-i şer‘-i hatîr-i lâzımü’t-tevkīrde li ebeveyn karındaşı bâ‘isü’l-kitâb Osman nâm kimesne mahzarında ikrâr ve takrîr-i kelâm edip tefvîz-i âtî sudûruna değin taht-ı tasarrufunda olup karye-i mezbûre sınırı dâhilinde vâki‘ bir tarafdan Hüseyin b. Mahmud tarlası ve bir tarafdan Hüseyin b. Şaban nâm kimesne tarlası ve bir tarafdan Hüseyin b. Abdullah tarlası ve bir tarafdan tarîk-i âm ile mahdûd ve tahmînen dört keyl tohum isti‘âb eder bir kıt‘a tarlamın hakk-ı tasarrufunu sâhib-i arz ma‘rifetiyle karındaşım merkūm Osman’a yedi yüz akçe bedel mukābelesinde ferâğ ve tefvîz edip ol dahi vech-i muharrer üzre tefevvuz ve kabûl eyledikden sonra bedeli olan meblağ-ı mezbûr yedi yüz akçeyi merkūm Osman yedinden tamâmen ahz u kabz edip mârrü’z-zikr tarlayı mahallinde zabt ve tasarrufa merkūm Osman’ı taslît eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Hüseyin b. Ali, Ali b. Ali, İsmail b. Mustafa, Ali b. Abdullah, Ahmed Beşe b. Abdullah.