Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 160 Hüküm no: 163 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Perebye bt. Manol’ün Cafer Paşa Vakfı’na borcu olduğu Mahmiye-i Kostantıniyye hısnı ebvâbından Eğrikapı dâhilinde Avcıbey mahallesinde sâkine Perebye bt. Manol nâm zimmiye mahfil-i kazâda medîne-i Hazret-i Ebî Eyyûb el-Ensârî’de vâki‘ merhûm Cafer Paşa vakfı’na bi’l-fi‘l mütevellî olan râfi‘ü hâze’l-kitâb Mehmed Beşe b. Hamza muvâcehesinde bi tav‘ihâ ikrâr ve i‘tirâf edip vakf-ı mezbûr malından asâlet ve kefâletden zimmetimde yirmi altı bin dört yüz akçe asl-ı mâldan işbu târih-i kitâb şehri Şabanı gurresinde atîk ve cedîd mu‘âmele-i şer‘iyyeden dahi dört bin yedi yüz akçe cem‘an vakf-ı mezbûr malından vech-i meşrûh üzre zimmetimde mütekarrir otuz bir bin yüz otuz akçe deynim olup meblağ-ı mezbûr hâlâ vâcibü’l-edâ ve lâzımü’l-kazâ deynimdir deyicek gıbbe’t-tasdîki’ş-şer‘î mâ vaka‘a ketb olundu. Hurrire fi’l-yevmi’s-sâlis min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Abdülkādir Çelebi b. Mehmed Efendi, Mustafa Efendi b. ( ) el-Müderris, Mustafa Çelebi b. Ali el-İmâm, es-Seyyid Mustafa Çelebi b. ( ) el-Müezzin, Yakub b. Kurd, Mahmud b. Ahmed, Abdullah b. ( ) el-Müezzin ve gayruhüm.