Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 161 Hüküm no: 164 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanko v. Mihal’in bağını Yorgo v. Nikola’ya sattığı Vilâyet-i Rumeli’nde Delvine sancağında Mazaraki kazâsına tâbi‘ Pravisçe nâm karye sâkinlerinden Yanko v. Mihal nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-vesîka Yorgo v. Nikola nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde vâki‘ bir tarafdan Yani v. Mihal bağı ve bir tarafdan Todori v. Koli bağı ve bir tarafdan diğer Koli v. Velako bağı ve bir tarafdan Dimo v. Şimo nâm zimmî bağı ile mahdûd ve mümtâz olup üç dip incir ağacını müştemil tahmînen üç çapalık mülk bağı, mezbûr Yo[r]go’ya fıddî nakd-i râyic fi’l-vakt iki bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semeni olan meblağ-ı mezbûr iki bin beş yüz akçeyi mezbûr Yorgo yedinden bi’t-tamâm ve’l-kemâl ahz ve kabz edip mebî‘-i mezbûru mahallinde zabt ve tasarrufa mezbûr Yo[r]go’yu taslît eyledim keyfe mâ yeşâ’ ve yahtâr mutasarrıf olsun dedikde mukırr-ı mezbûr Yanko’nun minvâl-i muharrer üzre cârî olan ikrârını el-mukarru lehü’l-merkūm Yorgo vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Cafer b. Abdullah, Mustafa b. Veli, Mahmud b. Ahmed, Dimo v. Nikola, İstati v. Nikola, Yorgo v. Nikola, İstati [v.] Yorgi, Yorgo [v.] Minho, Ravto v. Yani, Zoto v. Koyo, Dimo [v.] Kavay.