Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 164 Hüküm no: 167 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun b. Hasan’ın vakfa ait evin tasarruf hakkını Potola bt. Şiva’ya devrettiği Mahmiye-i Kostantıniyye hısnı ebvâbından Balat kapısı hâricinde Karabaş mahallesinde sâkine Fâtıma Hâtun bt. Hasan tarafından ikrâr-ı âti’z-zikre vekîl olup vekâleti mezbûre Fâtıma’yı ma‘rifet-i şer‘iyye ile ârifeyn olan İsmail Halîfe b. Mehmed el-İmâm ve Mehmed b. Abdullah şehâdetleri ile şer‘an sâbite olan Ebûbekir b. Mehmed nâm kimesne mahfil-i kazâda işbu hâmiletü’l-kitâb Potola bt. Şiva nâm Yahudiye tarafından tasdîk-i câi’z-zikre vekîl olup bimâ hüve nehcü’s-sübût şer‘an vekâleti sâbite olan zevci Yasef v. Avraham nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkilem mezbûre Fâtıma Hâtun mahalle-i mezbûrede vâki‘ merhûm Şücâ‘ el-Mismârî vakfı’ndan icâre-i mu‘accele ve müeccele ile tasarrufunda olup bir tarafdan vakf-ı mezbûra etrâf-ı selâseden tarîk âm ile mahdûd olup iki bâb tahtânî beyti ve bi’r-i mâyı ve muhavvatayı ve tarîk-i âm tarafında muttasıl bir bâb dükkânı müştemil olup vakf-ı mezbûra beher şehr otuz akçe icâre-i müeccelesi olan menzilin hakk-ı tasarrufunu mütevellî-i vakf ma‘rifetiyle on sekiz bin fıddî nakd-i râyic fi’l-vakt akçe mukābelesinde fâriğa olup bedel-i mezbûr on sekiz bin mezbûrü’n-na‘t akçeyi mezbûre Potola yedinden bi’t-tamâm alıp kabz edip menzil-i mezbûru merkūme Potola’ya teslîm etmişdir dedikde mukırr-ı mezbûr Ebûbekir’in vech-i meşrûh üzre bi’l-vekâle cârî olan ikrârını mezbûr Yasef vekâleten bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’r-râbi‘ min şehri Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Mehmed b. İsmail el-Müezzin, Hüseyin Çelebi b. ( ), Mehmed Çelebi b. Mustafa, Abdi Bey b. Mehmed, Mahmud b. Ahmed, Mustafa b. Veli, Ali b. Mustafa ve gayruhüm.