Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 165 Hüküm no: 169 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa ile kendisini bıçakla yaralayan Mehmed b. Abdullah’ın bedel karşılığı sulh olması Husûs-ı âti’z-zikrin mahallinde tahrîr olunması iltimâs olunmağın mahkeme-i şerîfeden mevlânâ Receb Efendi b. Abdi irsâl olunup ol dahi zeyl-i kitâbda mastûrü’l-esâmî olan müslimîn ile medîne-i Hazret-i Ebî Eyyûb el-Ensârî mahallâtından Davud Ağa mahallesinde vâki‘ Mehmed b. Mustafa nâm kimesne menziline varıp akd-i meclis eylediklerinde meclis-i mezbûrda diğer Mehmed b. Abdullah nâm kimesne mecrûhan işbu râfi‘ü’l-kitâb merkūm Mehmed b. Mustafa mahzarında ikrâr ve takrîr-i kelâm edip merkūm Mehmed b. Mustafa târih-i kitâbdan bir gün mukaddem ba‘de’l-mağrib kendi sâkin olduğum menzilimin kapısı önünde kendi hâlim ile mukayyed iken mezbûr gelip beni bıçak ile urup sol küreğim üstünde mecrûh eylemekle ben dahi da‘vâ ve husûmet eylediğimde merkūm Mehmed b. Mustafa inkâr etmeğin ben müdde‘âmı isbât etmek sadedinde iken mâbeynimize muslihûn tavassut edip dört yüz nakd-i râyic fi’l-vakt fıddî akçe üzerine inşâ-i akd-i sulh eylediklerinde sulh-i mezbûru kabûl ve bedel-i sulh olan meblağ-ı merkūm dört yüz akçeyi yedinden bi’t-tamâm ve’l-kemâl ahz ve kabz eyleyip husûs-ı merkūma müte‘allik da‘vâdan merkūm Mehmed b. Mustafa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î vâki‘ hâlî mevlânâ-yı mezbûr mahallinde tahrîr ba‘dehû gelip meclis-i şer‘de vukū‘u üzre inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Davud Halîfe b. Mehmed el-Müezzin, Yusuf Bey b. Tayyib, Ali b. Hasan, Abdülkerim b. Mehmed, Mehmed b. Mustafa, Mustafa Çelebi b. Receb, Mustafa b. Mehmed, Ahmed b. Mehmed, Mustafa b. Mahmud, Ahmed b. Yunus.