Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 165 Hüküm no: 170 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüplü Mustafa adlı çocuğun önceki vasisi Murad Dede üzerinde çocuğa ait para kalmadığı Medîne-i Hazret-i Ebî Eyyûb el-Ensârî mahallâtından ( ) mahallesinde bundan akdem müteveffâ olan Mahmud nâm kimesnenin sulbî oğlu Mustafa nâm sagīre kıbel-i şer‘den mansûbe vasî olan vâlidesi Kamer bt. Abdullah nâm hâtun tarafından husûs-ı âti’z-zikre vekîl olup bimâ hüve nehcü’s-sübût şer‘an vekâleti sâbite olan zevci Ömer b. ( ) nâm kimesne mahfil-i kazâda sagīr-i mezbûrun mukaddemâ vasîsi olan râfi‘ü hâze’l-kitâb Murad Dede b. Abdullah muvâcehesinde takrîr-i da‘vâ edip mezbûr Murad Dede vesâyetden azl olunduğu zamânda muhâsebesi görüldükde, sagīr-i mezbûrun on dokuz bin akçe malın ikrâr edip müvekkilem mezbûre Kamer Hâtun vesâyeti hasebiyle meblağ-ı mezbûrun on altı bin akçesin merkūm Murad Dede yedinden ahz ve kabz edip zimmetinde üç bin akçe bâkī kalmışidi el-hâletü hâzihî vekâletim hasebiyle zikr olunan on bin akçeyi taleb ederim suâl olunup alıverilmesi matlûbumdur dedikde gıbbe’s-suâl mezbûr Murad Dede cevâbında, fi’l-hakīka sagīr-i mezbûra vasî olduğumda on dört bin akçesin kabz ve yedi sene istirbâh edip hâsıl olan ribhinden sagīr-i mezbûrun zikr olunan yedi senede nafaka ve kisvesi ve sâir mesârifine sarf eylediğimden sonra vesâyetden ma‘zûl olup muhâsebem görüldükde, Şeyh Nasrullah Efendi ve karındaşı Avnullah Efendi zimmetlerinde sagīr-i mezbûr malından on akçesi on bir buçuk akçe hesâbı üzre olan dokuz bin akçenin yedi senede cem‘ olan dokuz bin dört yüz elli akçe ribhi hesâb-ı mezkûr üzre tahsîl olunur zu‘mu ile on dokuz bin akçe ikrâr etmişdim, lâkin merkūmân Nasrullah Efendi ve Avnullah Efendi meblağ-ı mezbûru on akçesi on bir akçe hesâbı üzre edâ etmekle meblağ-ı merkūm on dokuz bin akçeye üç binden ziyâde akçe noksân terettüb etmişdir ol ecilden on altı bin akçesin merkūm Kamer Hâtun’a teslîm eyledim hesâb-ı mezkûr üzre üç binden mütecâviz akçem merkūmân Nasrullah Efendi ve Avnullah Efendi zimmetlerinde kalmışdır ben kabz eyledim deyicek mezbûrân Nasrullah ve Avnullah Efendi meblağ-ı mezbûr dokuz bin akçenin ribhinden mezkûr Murad Dede on akçesi on bir hesâbından ziyâde akçe kabz eylemediğine mezbûr Ömer’den beyyine taleb olundukda ityân-ı beyyineden âciz olup istihlâf etmeğin mezbûr Murad Dede meblağ-ı merkūm dokuz bin akçenin ribhinden on akçesi on bir akçe hesâbından ziyâde kabz eylemediğine ve sagīr-i mezbûr malından zimmetinde bir akçe ve bir habbe kalmadığına yemîn bi’llâhi aliyyi’l-azîm etmeğin mâ vaka‘a bi’t-taleb ketb olundu. Hurrire fî evâsıtı Recebi’l-mürecceb târihi’l-mezbûr. Şuhûdü’l-hâl: Mustafa b. İsa, Abdülkādir Çelebi b. Mehmed, Mustafa Efendi b. ( ) el-Kâtib, Siyâmi Efendi b. ( ), Mustafa b. Veli ve gayruhüm.