Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 166 Hüküm no: 171 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaymakam Mustafa Paşa’nın İskender Paşa Camii çeşmesi suyolunun keşfi [Derkenâr:] Mustafa Paşa’nın İskender Paşa câmi‘i kurbunda binâ edeceği çeşmeye. Düstûr-ı ekrem müşîr-i efham nizâmü’l-âlem sadr-ı dîvân-ı gerdûn-nişân vekîl-i mutlak Süleyman-ı devrân âsaf-ı zamân müdebbir-i umûrü’l-cumhûr bi’l-fikri’s-sâkıb mütemmimi mehâmmü’l-enâm bi’r-re’yi’s-sâib mümehhid-i bünyânü’d-devleti ve’l-ikbâl müşeyyidü erkânü’s-sa‘âdeti ve’l-iclâl el-mahfûf bi sunûfi’l-avâtıfi’l-meliki’l-müte‘âl bi’l-fi‘l kāimmakām-ı sadâret-i uzmâ olan Mustafa Paşa -yesserallâhu mâ yürîdü ve yeşâ’- hazretlerinin kethüdâları ve husûs-ı câ’i’l-beyâna vekîlleri olan umdetü’l-emâcid ve’l-a‘lâ câmi‘ü’l-mehâmid ve’l-me‘âlî zü’l-kadri’r-refî‘ ve’ş-şâni’l-menî‘ Rıdvan Kethüdâ meclis-i şer‘-i şerîf-i lâzımü’t-tevkīrde takrîr-i kelâm ve bast-ı merâm edip müvekkil-i müşârün-ileyh -tâle bekāhu ve nâle [mâ] yetemennâhu- hazretleri mahmiye-i Kostantıniyye -hamâhallâhu te‘âlâ ani’l-beliyye- de Yeniodalar kurbunda vâki‘ hasbeten lillâhi’l-azîm ve taleben li merzâti’r-Rabbi’r-Rahîm tecdîd ve ihyâ buyurdukları İskender Paşa Câmi‘i demekle ma‘rûf câmi‘-i şerîflerine binâ buyurdukları çeşmede icrâ için Havâss-ı Aliyye-i celîle -suyyinet min külli âfetin ve beliyye-de Topçular nâm mevzi‘de vâki‘ Araba Emîni çiftliği demekle meşhûr çiftlik kurbunda mevâzi‘-i adîdede arz-ı hâliyeyi kendi hâlis mâlları ile hafr ettirmekle cem‘ edip yine mahallinde ifrâz olunmak üzre mahall-i mezbûra karîb merhûm ve mebrûr ed-dâricü ilâ medârici rahmetü Rabbihi’l-gafûr Sultan Süleyman Hân -aleyhi’r-rahmetü ve’l-gufrân- hazretleri suyunun mecrâsına mütevellîsi izniyle ilhâk eyledikleri mülk-i hâlisleri olan mâ’nın erbâbı miyânında mu‘tâd olan tarz-ı ma‘rûf ve semt-i me’lûf üzre mikdârı vezn olunmak üzre murâd-ı şerîfleri olmağın kıbel-i şer‘-i şerîfden keşf ve terkīm için nâib irsâl olunmak taleb ederim dedikde savb-ı şer‘-i kavîmden mevlânâ Mustafa Efendi irsâl olunup ol dahi mi‘mârbaşı olan kıdvetü’l-emâsil ve’l-akrân Kasım Ağa b. Ali ve hâssa su yolcuları nâzırı olan umdetü’l-a‘yân zübdetü’l-akrân Hasan Ağa b. Abdülmennân ve su yolcuları Mahmud b. Abdullah ve Osman b. Abdullah ve zeyl-i kitâbda muharrerü’l-esâmî müslimîn ile mahall-i mezbûra varıp vezîr-i müşârün-ileyh -lâ-zâle mürâca‘an ileyh- hazretlerinin mahall-i merkūmda hafr ve cem‘ edip merhûm-ı mûmâ-ileyh hazretlerinin suyu mecrâsına ilhâk eyledikleri mâ’sı keşf ve müşâhede ve vezn-i sahîh ile alâ vechi’l-mu‘tâd vezn eylediklerinde mecmû‘u ashâbı ıstılâhı üzre dört masura bulunup zikr olunan dört masura mâ’nın âdet-i me’lûfe üzre sülüsü hakk-ı mecrâ olup sülüsânı murâd eyledikleri mahalden zikr olunan [27a] çeşmeye ifrâz olunmak üzre icmâ‘ ve ittifâk eylediklerini mevlânâ-yı mezbûr mahallinde tahrîr, ba‘dehû meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ ketb olundu. Hurrire fi’l-yevmi’t-tâsi‘ min Şa‘bâni’l-mu‘azzam li sene seb‘a ve erba‘în ve elf min hicreti men lehü’l-izzü ve’ş-şeref. Şuhûdü’l-hâl: Ahmed Çelebi b. Abdullah, Mehmed Çelebi b. ( ) el-Kâtib, Mehmed Kethüdâ b. ( ), Mehmed b. Yahya, Ali b. Mehmed, Mehmed b. Derviş, Mehmed b. İsmail, Ebûbekir b. Ömer, Ali b. Hamza.