Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 168 Hüküm no: 172 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mustafa’nın evini Mustafa Çelebi b. Hacı İsa’ya sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Dökmecibaşı mahallesi sükkânından Mehmed Bey b. Mustafa mahfil-i kazâda râfi‘-i hâze’l-kitâb Mustafa Çelebi b. el-Hâc İsa mahzarında bi’t-tav‘i’s-sâf ikrâr ve i‘tirâf edip mahall-i mezbûrede vâki‘ bir tarafdan Borazan Mehmed Çelebi eytâmı mülkü ve bir tarafdan Ak Mehmed Çelebi nâm kimesne mülkü ve iki tarafdan tarîk-i âm ile mahdûd iki bâb tahtânî beyti ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil olup işbu ferâğ sudûruna değin icâre-i mu‘accele ve beher şehr on beş akçe ücret-i müeccele ile taht-ı tasarrufumda olan menzilin hakk-ı tasarrufunu mûmâ-ileyh Mustafa Çelebi’ye icâre-i mu‘accele olunmak üzre iki bin akçe bedel ile fâriğ olup zikr olunan iki bin akçe icâre-i mu‘acceleyi bi’t-tamâm yedinden alıp kabz eyledim ba‘de’l-yevm menzil-i mezbûr müşârün-ileyh Mustafa Çelebi’nin dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ hüve’l-vâki‘ ketb olundu. Hurrire fi’l-yevmi’t-tâsi‘ aşer min Recebi’l-ferd li sene seb‘a ve erba‘în ve elf. Şuhûdü’l-hâl: Mehmed Efendi b. Ali, Abdülkādir Çelebi b. Mehmed Çelebi, Mustafa Efendi b. ( ) el-Müderris, Siyâmi Efendi b. Tahir, Mehmed b. ( ), Yakub b. Kurd, Mahmud b. Ahmed, Mustafa b. Veli, Cafer b. Abdullah ve gayruhüm.