Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 168 Hüküm no: 173 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstefan v. Yorgi’nin Mehmed Subaşı’ya olan borcunu varislerine ödemesi Mahmiye-i Kostantıniyye hısnı ebvâbından Edirnekapısı dâhilinde vâki‘ Neslişah Sultan mahallesinde sâkin iken vefât eden merhûm Mehmed Subaşı b. Keyvan’ın verâseti zevce-i metrûkesi ve vârisesi Ümmügülsüm bt. Hasan nâm hâtun ile sulbiye kebîr kızı Âişe’ye münhasıra olup ve merkūme Ümmügülsüm mezbûre Âişe’nin hâl-i sıgārında vasiyy-i mansûbesi olduğu şer‘an müte‘ayyin oldukdan sonra mezbûretânı ma‘rifet-i şer‘iyye ile ârifân olan Mustafa Halîfe b. Mehmed el-Müezzin ve Mehmed Çelebi b. Mehmed şehâdetleri ile şer‘an vekâleti sâbite olan Mustafa Çelebi b. Hasan mahfil-i kazâda işbu bâ‘isü’l-kitâb kuyumcu [İ]stefan v. Yorgi muvâcehesinde bi’l-vekâle ikrâr ve takrîr-i kelâm edip müteveffâ-yı mezbûr Mehmed Subaşı’nın merkūm İstefan zimmetinde cihet-i karzdan on sekiz bin akçe hakkı olup ba‘de vefâtihî müvekkiletân-ı mezbûretâna intikāl etmekle mezbûre Ümmügülsüm meblağ-ı mezbûrun bir def‘a altı bin ve bir def‘a dört bin ve bir def‘a dahi dört bin akçe ki cem‘an on dört bin akçesini kendi tarafından asâleten ve mezbûre Âişe tarafından vesâyeten mezbûr İstefan yedinden ahz ve kabz edip zimmetinde dört bin akçe bâkī kalmışidi el-hâletü hâzihî müvekkiletân-ı mezbûretân Ümmügülsüm ve Âişe meblağ-ı bâkī dört bin akçenin bin akçesinden mezbûr İstefan’ın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eylediklerinden sonra bâkī üç bin akçesini vekâletim hasebiyle mezbûr İstefan yedinden hâlâ ben ahz ve kabz edip müvekkiletân-ı mezbûretâna îsâl eyledim min ba‘d meblağ-ı merkūm on sekiz bin akçeden mezbûr İstefan zimmetinde bir akçe ve bir habbe bâkī kalmadı dedikde vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâmin min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Ali Efendi b. Ahmed el-İmâm, Hüseyin Çavuş b. Abdullah, Hüseyin Çelebi b. Sefer, Ahmed Ağa b. Abdullah, Durmuş Beşe er-Râcil, Ali Çelebi b. Hüseyin, Mustafa b. Mehmed, Debbâğzâde İbrahim Çelebi, Mehmed Çelebi b. Mahmud, Abdi b. Mustafa ve gayruhüm.