Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 169 Hüküm no: 174 Orijinal metin no: [27a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Abdullah’ın bağ ve tarlalarını Musa Efendi’ye devrettiği Dârü’s-saltanati’s-seniyye sâbıkan mahmiye-i Kostantıniyye kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî hâvi’l-ma‘kūl ve’l-menkūl câmi‘ü’l-fürû‘ ve’l-usûl alemü’l-ilm ve’l-hüdâ menârü’l-fazl ve’t-tukā Musa Efendi hazretlerinin taraf-ı karînü’ş-şereflerinden ikrâr-ı âti’z-zikri tasdîka vekîl olup bimâ hüve nehcü’s-sübût şer‘an vekâleti sâbite olan Hasan Çelebi b. İbrahim mahzarında mahmiye-i merkūme hısnı ebvâbından Kumkapısı kurbunda Nişancı mahallesinde sâkine Râbia bt. Abdullah nâm hâtun mahfil-i kazâda bi tav‘ihâ ikrâr ve i‘tirâf edip vilâyet-i Anadolu’da Yalakābâd kazâsına tâbi‘ Kılıçköyü demekle ma‘rûfe karyede vâki‘ bir tarafdan Mustafa Beşe mülkü ve bir tarafdan Hoca Sevindik mülkü ve bir tarafdan Abdullah b. Mehmed mülkü ve taraf-ı râbi‘den Mehmed b. Emrullah mülkü ile mahdûd ve mümtâz bir bâb çatma odayı ve altı göz anbarı ve eşcâr-ı müsmire ve gayr-ı müsmireyi ve arz-ı hâliyeyi müştemil olup işbu akdin sudûruna değin silk-i mülk-i sahîhimde münselik olan bir kıt‘a mülk bağımı cemî‘ tevâbi‘ ve levâhıkı ile müşârün-ileyh Efendi hazretlerine fıddî nakd-i râyic fi’l-vakt on bin akçeye bey‘-i bâtt-ı sahîh-i şer‘î ile bey‘ edip onlar dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde sâhil-i bahr tarafında Şevkli Bahçesi demekle ma‘rûf mahalde vâki‘ bundan akdem fevt olan zevcem İlyas Bey’in mahlûlünden resm-i tapu ile tevfîz eylediğim bir tarafdan Beyzâde Mustafa tarlası ve bir tarafdan Eğri [27b] boyun nâm kimesnenin tarlası ve tarafeynden tarîk-i âm ile mahdûd tahmînen otuz keyl tohum istî‘âb eder bir kıt‘a tarlanın ve zikr olunan bağ kurbunda vâki‘ lede’l-ahâlî ve’l-cîrân ma‘lûmü’l-hudûd tahmînen altmış keyl tohum istî‘âb eder merkūm İlyas Bey’in mahlûlünden kezâlik tefevvuz eylediğim bir kıt‘a tarlanın ve yine mezkûr İlyas Bey’in mahlûlünden kezâlik tefevvuz eylediğim korunun hakk-ı tasarruflarını, mûmâ-ileyh Efendi hazretlerine beş bin akçe bedele tefvîz ve sâhib-i arz ma‘rifetiyle tefevvuz edip onlar dahi vech-i meşrûh üzre tefevvuz ve kabûl eylediklerinden sonra bedel-i mezbûr beş bin akçe ve semen-i merkūm on bin akçe ki cem‘an on beş bin akçeyi bi tamâmihî yedlerinden ahz ve kabz edip zikri sebk eden bağı ve tarlaları ve koruyu mahallinde ahz ve kabz ve tasarrufa mûmâ-ileyh Efendi hazretlerini taslît eyledim ba‘de’l-yevm zikr olunan bağ mülk-i müşterâları ve sâlifü’z-zikr tarlalar ve koru dâhil-i taht-ı tasarrufları olmuşdur, keyfe mâ yeşâ’ ve hasebe mâ yürîd mutasarrıf olsunlar dedikde mukırra-i merkūme Râbia Hâtun’un ikrâr-ı meşrûhunu vekîl-i merkūm Hasan Çelebi bi’l-vekâle vicâhen ve şifâhen tasdîk ve tahkīk edicek mâ hüve’l-vâki‘ ketb olundu. Hurrire fi’l-yevmi’l-âşir min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Hızır b. Süleyman, Hüseyin b. Yusuf, Mustafa b. Mehmed, İbrahim [b.] Hasan, Mahmud b. Ahmed, Mustafa Beşe.