Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 170 Hüküm no: 175 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Efendi b. Mehmed’in Abdurrahman Efendi b. Abdullah’a olan borcunu ödemesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm Hamza Bey mescid-i şerîfinde imâm olan işbu bâ‘isü’l-kitâb Abdurrahman Efendi b. Abdullah mahfil-i kazâda Mahmud Efendi b. Mehmed nâm kimesne mahzarında üzerine takrîr-i da‘vâ edip dergâh-ı âlî kapıcıbaşılarından olup bundan akdem vilâyet-i Anadolu’da Kastamonu sancağında vâki‘ Küre-i Nühâs Emîni olan Ahmed Ağa nâm kimesne, târih-i kitâbdan üç sene mukaddem bizim ikimizden otuz altı bin iki yüz nakd-i râyic fi’l-vakt fıddî akçe istikrâz edip biz dahi meblağ-ı merkūmu mezbûr Mahmud Efendi ile müşterek malımızdan ikrâz ve teslîm eylemişdik hâlâ mezbûr Mahmud Efendi mebâliğ-i mezbûrdan vilâyet-i merkūmede mûmâ-ileyh Ahmed Ağa yedinden iki bin altı yüz akçeye iki donluk al dârâyî ve beş bin akçeye bir sîm raht ve her keyli otuzar akçeden elli keyl kaplıca bin beş yüz akçeye ve üç batman keten yüz seksen akçeye ve nakid üç bin altı yüz akçe ve bir def‘a dahi on iki bin üç yüz otuz akçe ve bir def‘a dahi bin yedi yüz doksan akçe ki cem‘an yirmi yedi bin akçe ahz ve kabz eylemiş vâki‘ hâl suâl olunup meblağ-ı mezbûrdan benim hisseme isâbet eden on üç bin beş yüz akçemi alıverilmek matlûbumdur dedikde gıbbe’s-suâl mezbûr Mahmud Efendi müşârün-ileyh Ahmed Ağa’ya müdde‘î-i merkūm Abdurrahman Efendi ile müşterek oldukları mâllarından otuz altı bin iki yüz akçe ikrâz [ve] teslîm eylediklerini ve meblağ-ı mezbûrun minvâl-i muharrer üzre yirmi yedi bin akçesini ahz ve kabz eylediğini bi’t-tav‘i’s-sâf ikrâr ve i‘tirâf edip lâkin meblağ-ı mezbûrun dokuz bin üç yüz kırk akçesini merkūm Abdurrahman Efendi’nin emri ile gāib ani’l-meclis Karamanlı Mehmed nâm kimesneye def‘ ve teslîm eyleyip zikr olunan rahtı dahi üç bin akçeye bey‘ eyledim deyû cevâb vermeğin ikrârı mûcebince makbûzu olan yirmi beş bin akçenin müdde‘î-i mezbûr Abdurrahman Efendi’ye edâsı lâzım olan on iki bin beş yüz akçeden merkūm Karamanlı Mehmed’e def‘ ve teslîm eylediği dokuz bin üç yüz kırk akçe ihrâc olundukdan sonra zimmetinde zuhûr eyleyen üç bin yüz altmış akçeyi merkūm Abdurrahman Efendi’ye edâ etmek üzre merkūm Mahmud Efendi’ye tenbîh olunup mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve erba‘în ve elf. Şuhûdü’l-hâl: Siyâmi Efendi b. Tahir, Hacı Osman b. Abdullah, Diğer Osman Beşe b. Abdullah, Mustafa Çavuş b. Halil, Hacı Hızır Sahhâf, Mehmed Dede Sahhâf, Abdülkādir b. Mehmed ve gayruhüm.