Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 171 Hüküm no: 176 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe’nin evini Rıdvan b. Abdullah’a sattığı Havâss-ı Aliyye kazâsı müzâfâtından Terkos nâhiyesine tâbi‘ Azadlı nâm karye sâkinelerinden Âişe bt. ( ) nâm hâtun tarafından bey‘-i âti’z-zikri ikrâra vekîl olup vekâleti mezbûre Âişe’yi ma‘rifet-i şer‘iyye ile ârifeyn Mahmud b. Hasan ve Ali b. İbrahim şehâdetleri ile şer‘an vekâleti sâbite olan Süleyman b. Mehmed nâm kimesne mahfil-i kazâda işbu hâmilü’l-kitâb Rıdvan [b.] Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe silk-i mülkünde münselik olan emlâkinden karye-i mezbûrede vâki‘ bir tarafdan Mehmed Beşe b. Abdullah mülkü ve bir tarafdan Ali nâm kimesne mülkü ve bir tarafdan Şeyhzâde Nimetullah Çelebi mülkü ve bir tarafdan Rıdvan b. Abdullah [28a] mülkü ile mahdûd bir bâb fevkānî ve bir bâb tahtânî iki beyti ve muhavvatayı ve muttasıl zât-ı eşcâr-ı müsmire ve gayr-ı müsmire hadîkayı müştemil mülk menzilini, cümle gayr-ı tevâbi‘ ve levâhıkı ile mezbûr Rıdvan’a otuz üç aded sikke-i haseneye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ ve teslîm edip ol dahi vech-i meşrûh üzre iştirâ ve kabûl eyledikden sonra semen-i mezbûr otuz üç aded sikke-i hasene altını mezbûr Rıdvan yedinden bi’t-tamâm ahz ve kabz eyledi ba‘de’l-yevm sâlifü’z-zikr menzil-i mezbûr Rıdvan’ın mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde vekîl-i mezbûr Süleyman’ı minvâl-i meşrûh üzre cârî olan ikrârında mezbûr Rıdvan bi’l-muvâcehe tasdîk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sânî aşer min Şa‘bâni’l-mu‘azzam li sene seb‘a ve erba‘în ve elf. Şuhûdü’l-hâl: Halil b. Hüseyin, Durmuş Beşe b. ( ), Derviş b. Halil, Mehmed b. Abdullah, kahveci Mahmud [b.] Durak Beşe, Süleyman Çelebi b. ( ), Yusuf b. Abdullah ve gayruhüm.