Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 172 Hüküm no: 177 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Pervane’nin ev bağ ve tarlalarını Peto v. Kika’ya sattığı Sâbıkan vilâyet-i Rumeli’nde Premedi kazâsına tâbi‘ Arguzlet nâm karyeden olup hâlâ Havâss-ı Aliyye kazâsı müzâfâtından kasaba-i Çatalca’da vâki‘ hadîka-i sultâniyede bostancı olan Mustafa Beşe b. Pervâne nâm kimesne mahfil-i kazâda işbu hâmilü’s-sifr Peto v. Kika nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Hasan b. Süleyman mülkü ve bir tarafdan Göço v. Kika mülkü ve bir tarafdan Peço v. Kalani mülkü ve bir tarafı tarîk-i âm ile mahdûd üç bâb tahtânî beyti ve bir samanlığı müştemil mülk menzilimi ve beynimizde ma‘lûm kırk dip dut ve altı dip ceviz eşcârını müştemil hadîkayı ve lede’l-ahâlî ma‘lûmü’l-hudûd bir kıt‘a bostan yerimi ve bir şırahâne ve dört fıçı ve karye-i mezbûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd yedi kıt‘a bağımı mezbûr Peto’ya fıddî nakd-i râyic fi’l-vakt dört bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i mezkûre hudûdu dâhilinde vâki‘ lede’l-ahâlî ve’l-cîrân ma‘lûmü’l-hudûd tasarrufumda olan otuz kıt‘a tarlalarımın dahi hakk-ı tasarrufunu, sâhib-i arz ma‘rifetiyle mezbûr Peto’ya iki bin mezbûrü’n-na‘t akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr dört bin beş yüz akçe ile bedel-i tefvîz olan iki bin akçe ki cem‘an altı bin beş yüz akçeyi mezbûr Peto yedinden tamâmen alıp kabz edip mebî‘-i mezbûru mahallinde ahz ve kabz ve tesellüm ve tarlaları zabt ve tasarrufa mezbûr Peto’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Cafer b. İlyas, Osman b. İlyas, Sinan b. Kasım, Hasan b. Süleyman, Hasan b. Mehmed, Mahmud b. Ahmed.