Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 172 Hüküm no: 178 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câriye Mülâyim bt. Abdullah’ın sözleşme (mükâtebe) yoluyla azat edilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kızıl Mescid mahallesinde sâkin iken bundan akdem vefât eden merhûm Ali Bey b. Abdülmennân’ın verâseti sulbî kebîr oğlu Mustafa Efendi ile sulbiye kızı Mümine nâm hâtuna münhasıra olduğu şer‘an müte‘ayyin oldukdan sonra mezbûr Mustafa Efendi asâleten ve merkūme Mümine tarafından dahi husûs-ı âti’z-zikri ikrâra vekîl olup hasm-ı câhid mahzarında şer‘an vekâleti sâbite olan zevci Mehmed Bey b. Hamza vekâleten mahfil-i kazâda müteveffâ-yı mezbûrun mükâtebesi işbu râfi‘atü’l-kitâb açık kaşlı elâ gözlü uzun boylu sarışın Rûsiyyetü’l-asl Mülâyim bt. Abdullah mahzarında ikrâr ve i‘tirâf edip müteveffâ-yı mezbûr târih-i kitâbdan dokuz sene mukaddem hâl-i sıhhatinde memlûke câriyesi mezbûre Mülâyim üç sene hizmet etmek üzre mükâtebe etmişidi mezbûre Mülâyim dahi kitâbet-i merkūmeyi kabûl edip müteveffâ-yı mezbûre sıhhatinde üç seneden mütecâviz hizmet etmekle sâir harâir-i asliyyât gibi hürre olmuşdur, min ba‘d üzerinde hakk-ı velâdan gayrı hakkımız yokdur dediklerinde merkūm Mustafa Efendi’nin asâleten ve vekîl-i mezbûr Mehmed vekâleten minvâl-i muharrer üzre cârî ve sâdır olan ikrâr ve i‘tirâflarını mezbûre Mülâyim vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam târihi’l-mezbûr. Şuhûdü’l-hâl: Kıdvetü’l-vâ‘izîn eş-Şeyh Nasrullah Efendi b. eş-Şeyh Ömer Efendi, Fahrü’l-müderrisîn Avnullah Efendi b. eş-Şeyh Ömer Efendi, Ebûbekir Efendi b. ( ) İmâm-ı mahalle-i Sofular, Receb Efendi b. Abdi, Hasan Bey el-Cündî, Yakub b. Kurd, Mustafa b. Mehmed, Cafer b. Abdullah ve gayruhüm.