Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 173 Hüküm no: 179 Orijinal metin no: [28a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câriye Fağfur bt. Abdullah’ın sözleşme (mükâtebe) yoluyla azat edilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kızıl Mescid mahallesinde sâkin iken bundan akdem vefât eden merhûm Ali Bey b. Abdülmennân’ın verâseti sulbî kebîr oğlu Mustafa Efendi ile sulbiye kebîre kızı Mümine nâm hâtuna münhasıra olduğu şer‘an mütebeyyin oldukdan sonra mezbûr Mustafa Efendi asâleten ve mezbûre Mümine tarafından dahi husûs-ı âti’z-zikri ikrâra vekîl olup hasm-ı câhid mahzarında mezbûreyi ma‘rifet-i şer‘iyye ile ârifeyn olan Mehmed Çelebi ve Hasan Çelebi b. Mustafa Efendi şehâdetleri ile şer‘an vekâleti sâbite olan zevci Mehmed Bey b. Hamza vekâleten mahfil-i kazâda müteveffâ-yı mezbûrun mükâtebesi işbu râfi‘atü’l-kitâb açık kaşlı elâ gözlü kısa boylu sarışın Rûsiyyetü’l-asl Fağfur bt. Abdullah mahzarında ikrâr ve i‘tirâf edip müteveffâ-yı mezbûr târih-i kitâbdan dokuz sene mukaddem hâl-i sıhhatinden memlûke câriyesi [28b] mezbûre Fağfur’u üç sene hizmet etmek üzre mükâtebe etmişidi mezbûre Fağfur dahi kitâbet-i merkūmeyi kabûl edip müteveffâ-yı mezbûra sıhhatinde üç seneden mütecâviz hizmet etmekle sâir harâir-i asliyyât gibi hürre olmuşdur, min ba‘d üzerinde hakk-ı velâdan gayrı hakkım yokdur dediklerinde merkūm Mustafa Efendi’nin asâleten ve vekîl-i mezbûr Mehmed Bey vekâleten minvâl-i muharrer üzre cârî ve sâdır olan ikrâr ve i‘tirâflarını mezbûre Fağfur vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.